Nipangiussisussaatitaanermik unioqqutitsisimaneq politiit paasiniaaffigaat

Nipangiussisussaatitaanermik unioqqutitsineq pillugu Namminersorlutik Oqartussanit nalunaarutiginnittoqareersorlu, politiit suliami paasiniaapput.

Kalaallit Nunaanni Politiit Politimestereqarfianniit unnerluussisussaatitaaneq Morten Nielsen Sermitsiaq.AG-mut ilisimatitsivoq nalunaarutiginninnermut atatillugu Namminersorlutik Oqartussat pasisamik atermik taasisimanngitsut.

Namminersorlutik Oqartussat nalunaarutiginnipput

Allakkat saqqummiuteqqusaanngitsut, mittarfiit aningaasaliiffigineqarnissaannut ministeriunerup Lars Løkke Rasmussenip Kim Kielsenillu septembarip qulingani atsiugaannut tunngatillugu suliarineqarsimasut, facebookimut ikkunneqarsimaneri pillugit Naalakkersuisut Siulittaasoqarfianit septembarip aqqarnani ilisimaneqalerpoq.

- Taamatut assiliilluni saqqummiussineq naalakkersuisoqarfiup paasinninnera naapertorlugu atorfimmut atatillugu nipangiussisussaatitaanermut pinerluttulerinermi inatsisip aalajangersagaanik unioqqutitsinerummat, naalakkersuisoqarfiup suliaq politiinut nalunaarutigaa, politiillu suliaq pinerluttoqarneratut misissussagaat piumasaralugu , naalakkersuisoqarfik Sermitsiaq.AG-mut septembarip 17-ani ilisimatitsivoq.

Teknikkikkut uppernarsaatissat

- Suliap paasiniaaffigaarput, teknikki atorlugu uppernarsaatissaqarpugut killisiuereerlutalu, unnerluussisussaatitaaneq Morten Nielsen ilisimatitsivoq.

Suliamut tunngatillugu politiit siuariaatai Morten Nielsen iserfigerusunngilai. Suliamullu tunngatillugu Danmarkimiit ikiorneqarnerlutik aamma iserfigerusunnagu.

Qaqugu naammassissanersoq ilisimaneqanngilaq

Paasiniaaneq qaqugu naammassissanersoq suliamilu unnerluussisoqassanersoq ilisimaneqanngilaq.

Allakkat oqaatigeqqusaanngitsut Facebookimi quppernermi Anonymousimi saqqummiunneqarput. Quppernerup saqqummiisua kinaassutsiminik isertuussivoq, aammali isummat sakkortuut tassani saqqummiunneqartarlutik. Sermitsiaq.AG-p allakkat oqaatigeqqusaanngitsut facebookimut ilineqarsimasut ullumi ujaraluarpai nassaarinagilli, taamaammat ilimanarsinnaavoq Namminersorlutik Oqartussat suliamik politiinut tunniussereernerata kingorna allakkat peerneqarsimassasut.

Powered by Labrador CMS