Nipaannerujussuaq sermip qanngorpallanneranit taamaallaat akornuserneqartartoq
Nuuk Adventure nunaqavissunut takornarianullu, kangerlummut sermeqarfimmut assissaqanngitsumik angalaarusuttunut, tunisassiamik nutaamik neqerooruteqalernissamut piareerpoq.
Nunarput assigiinngitsorpassuartigut misigineqarsinnaavoq, najukkamilu takornariartitsisartoq periaatsimik nutaarluinnarmik asseqanngitsumillu neqerooruteqarnissamut piareerpoq. Neqeroorutigineqartoq nutaaq taaguuteqarpoq Stand up paddle boarding, nikuilluni anguartornermik imaluunniit SUP-itut ilisimaneqarnerusoq. Sammisassaq taanna nunarsuarmi sumiiffippassuarni atugaallualersimavoq, maannalu aamma nunatsinni sammisassatut neqeroorutigineqalerluni.
Mianersoqqissaarneq
Angalanermi kangerluk iigartartoqarfiusoq orninneqartassaaq, tamatumanilu umiarluusat boardsit nassatarineqartut pullanneqartarlutik piffissallu sivikitsup ingerlarnerani piareertarlutik. Kalaallit Nunaata imartaani imaq nillertorujussuummat anguartorniartut tamarmik atallaanik imermik
pitarneqarsinnaanngitsunik puttaqummillu atisitinneqartarput, imaanut nakkassagaluarunik nillernera ajornartorsiutigiumanagu. Puttaqut aamma VHF-radioqarlunilu aallakaatitsissuteqarpoq,
taamalu anguartortut tamarmik angallatip kortplotteriatigut takuneqarsinnaallutik. Taamaaliortoqarpoq isumannaallisaaneq ajunngitsumik pisinnaaqqullugu. Angallatip sinaatigut anguartorummut ikisoqarsinnaavoq pertujaassusialu maluginialerlugu. Qanoq pertujaatsiginera tupaallannartuuvoq.
Pinngortitaq alutornarluinnartoq
Anguartorneq aallarnerneqarsinnaavoq seeqqummerluni, tamanna toqqissisimanarnerutikkaanni, pertujaassutsip sungiunissaata tungaanut. Qanorli inissisimanissaq sungiutilertorneqartarpoq,
taamalu anguartortoqarsinnaalersarluni. Tassunga killlikkaanni nipaanneq pinngortitarlu najugarisaq sutigut tamatigut alutornarluinnartoq alutorsaatigineqaannarsinnaapput. Iluliamerngit
kigaatsuararsuarmik sanioqquallutik saatsersut. Nipisiassatuat tassaapput anguariarnerit iluliamerngillu seqquluppalunnerat, immaqalu angallatit ungasissumi ingerlarpalunnerat.
Alapernaasersoq
Eqqarsaatikka kisiisa ilagalugit anguartoruttorlunga puisi meterialuinnarnik ungasissuseqarluni nipeqanngitsumik puivoq. Annilaarsimarpasinnani puilluartitaarpoq takuniarlugu najukkaminiittoq sunaanersoq. Taamatut misigisaqarnissamut periarfissanik allanik takorluugaqarsinnaanngilanga. Taamaallaat takorloorsinnaavara anguartornermi arfermik naapitsineq qanoq issanersoq.
Qanngorpallannerit nipaassutsimut akornusiisut
Ilulissat aserortut assakartulluunniit qanngorpallannerit akuttunngitsumik tusarsaapput. Tamakkua nalunartoqarnerat pissutigalugu soorunami ingalassimaarniarpavut. Ilaat angingaatsiartuupput, qanittumili aserortoqassagaluarpat mallit takkuttut ima angitigisanngillat, umiarluusamik pertujaatsumik ajornanngitsumik qaangerneqarsinnaallutik. Imaanut nakkassagaluaraanni atallaat puttatitsisarput qilerullu nissunut atasoq aqqutigalugu umiarluusaq saavissinnaanani. Taamaattorli
nakkannginnama atallaat puttatitsisinnaanerat misiginiarlugu uanga nammineerlunga imaanut pissillunga misilippara.
Iluatsitsisorujussuusut
Ulloq taanna peqataanissamut qaaqquneqarfigisanni silamik iluatsitsisorujussuuvugut. Anoreqanngilluinnarpoq, imarlu qillariinnaalluni. Kangerluup iluani sila unerisimagajuttarpoq, ullorli
taanna immikkuullarippoq, kiangaatsiarlunilu. Qujanartumik atallaat iluanni atisalersorpallaarsimannginnissatsinnik oqarfigineqareersimavugut, tassami aalallualaarnikkut
atallaat ussissut imaaliallaannaq kiagunnartorujussuanngortarmata.
Misigisaq asseqanngitsoq
Nuuk Adventure aqqutigalugu taamatut angalaaraanni kangerlummut iigartartulimmut ingerlaarnermi arfernik takusassaqarajuttarpoq. Tamakkualu soorunami piffissaqarfigineqartarpoq, unikkallartoqartarlunilu. Nammineerluni taquarluarnissaq eqqaamaneqassaaq, angalaneq akunnerit arfineq-pingasut missaannik sivisussuseqarmat, akunnerillu taakkua ingerlalertoqaat. Misigisaq inassutigineqarluarsinnaavoq, tamannalu sioqqullugu sungiusaqqaarnissaq misilittagaqaqqarnissarlu pisariaqarnatik.
DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...