Nioqqutissat Europamit akikinnerusut
Morten Jørgen Heilmannip nioqqutissat Europamisut akilersillugit imaluunniit akikinnerusunngorlugit qanoq tunisinnaanerlugit oqaluttuaraa - siunissamili Royal Arctic Linep assartuinermi akigititassai aamma mittarfissuit atulerpata timmisartukkut assartukkanut akiusussat apeqqutaasorujussuussapput.
Nioqqutissat taama akisutigisariaqanngillat, tusatsiakkammi naapertorlugit akit qaffaseqisut tusartaratsigik, aammami pisiniarfinni pisiniat tamanna malugisinnaasarmassuk. Pikkori Sportimik piginnittoq aamma Nuuk Handelstandsforeningip siulittaasua Morten Jørgen Heilmann taama oqarpoq.
Aviisi Sermitsiaq taama allappoq.
Pitsaanerpaaq tassaavoq tunisassiortumit toqqaannartumik pisineq (imaluunniit suliffissuarmit) soorlu Danmarkimiittut pisiortorfiit imaluunniit niuertunut nioqqutillit, nioqqutissap Nunatsinnut ingerlaarnerani iluanaaruteqarujussuartartut.
– Niuertut ilaat meqqimik aalajangersimasumik Europami Skandinaviamiluunniit kisermaassillutik niuersinnaatitaasut aamma isumaqartaramik Nunatsinni tuniniaaffigineqartunut ikittunnguanut aamma tamanna atuuttariaqartoq. Iluanaarutigilluartarpaat tamakkulu qaavisigut assartuinermut aki qaffasissorujussuaq ilanngunneqartarluni aamma utaqqisoqarujussuartarluni, Morten Jørgen Heilmann aviisimut Sermitsiamut oqarpoq.
– Akunnermiliullutik niuertut akisutitsisorujussuit pinngitsoorsinnaasuugutsigik assartuinermilu akit akikillineqarpata, Europamit akikinnerusunik tuniniaasinnaassagaluarpugut, taanna naliliivoq.
Pisiniartartoq
Taassuma misilittakkani tunngavigalugit oqaluppoq.
Morten Jørgen Heilmannip ukiut 27-t sinnerlugit ingerlaneranni Europami nunarsuarmilu niuffatsitsinerit piffissamik angisuumik atuiffigisarpai. Taamani timersornermut atortunik tuniniaaneq pisiniarfinnguamini aallartikkamiuk angissutsit ataasiakkaat tamaasa, pitsaassusaat aamma qalipaataat ataasiakkaat pisiarisariaqartarpai. Taamanikkut ingerlatsiniarneq ajornakusooqaaq. Maannali ilisarisimaneqarnerulerpoq aamma timersornermi atortunik aamma timersornermi atisanik niuertut, sikkilinik assigisaannillu tuniniaasut assigiinngitsut amerlaqisut ikinngutigillualersimavai. Taamaalilluni nioqqutissanik suliffissuarnit toqqaannartumik pisisinnaanissaminut periarfissaqalerpoq.
Assersuutigalugu Canadamiut sikkilii Konat Kinami suliffissuarmit toqqaannartumik pisiarisarpai.
- Sikkilinik Konanik nioqqutilinnik ukiuni 25-ni suleqateqareerpunga. Aamma taamaalillunga Aasiami suliffissuarmit toqqaannartumik containerinik 3-4-nik ukiut tamaasa nassinneqartarlunga, taanna oqaluttuarpoq.
Nassiussinermi akit
– Royal Arctic Linep Islandimik suleqateqarnini aallartippagu assartuinermut akigititassai pissanngatigisorujussuuakka. – Nalinginnaasumik isumaqarpugut Royal Arctic Linep Eimskipimik assartueqateqalerniarnera nunarsuarmullu sukkanerusumik attaveqalerniarnera soqutiginartorujussuusoq.
– Uatsinnut pisiniarfinnut suliffissuarnit Asiamiittunit imaluunniit Amerikamiittunit nioqqutissanik toqqaannartumik pissarsisartussanut pingaaruteqartorujussuusussaavoq. Nioqqutissat sukkanerusumik tigusinnaalissagivut qularutissaanngilaq. Qanorli akeqartitsinissaat pissangalluta utaqqivarput, oqarpoq.
Aviisimi Sermitsiami atuarnerusinnaavutit. Aviisi uani pissarsiariuk: