Katersuiniarneq
Nina aamma Arnakkuluk Røde Korsimut 42.000 koruuninik katersisimapput
Nina Kreutzmann Jørgensen katersuiniarnermini anguniakkani anguaa, tapeeqataasullu ilaannut eqqiaanissamik imaluunniit qanimut tusarnaartitsinissamik qujassutitut neqeroorpoq
41.900 koruunit.
Syriami sorsuttoqarnerata kinguneranik qimaasorpassuaqarneranut atatillugu, Arnakkuluk Jo Kleist aamma Nina Kreutzmann Jørgensen Røde Kors aqqutigalugu taama annertutigisumik katersillutik iluatsippaat.
Anguniagaq angugaa
Septemberip arfineq-aappaanni katersilluni aallartikkamili, Nina Kreutzmann Jørgensen 21.850 koruuninik katersisimavoq. Qaammatip ataatsip ingerlanerani anguniarsimavaa 20.000 koruunit. Piffissarititallu naammassinissaanut ullut marluinnanngortut iluatsippaa, taamaammallu tulluusimaarpoq.
- Tamassi tapiissutissinnut qujanarujussuaq. Nuanneqaaq aamma kialaarnermik misiginarpoq ataatsimoorluta 20.000 koruunit Røde Korsimut tunniussinnaagatsigit aammalu inunnut ajornartorsiortunut ikiuunnerannut, Nina Kreutzmann Jørgensen Facebookimi allappoq.
Atuaruk: Qimaasunik ajornartorsiut Ninap tupassutigaa
Pinnatassamik toqqaaneq
Tapeeqataasut ilaat, Jacob Froberg, 1.500 koruuninik tapiisoq, taamaalillunilu Kalaallit Nunaata Rockmamaata katersuiniarnermini qulakkeereqataanermini immikkut ittumik tunissuteqarfigineqarnissani qilanaarilereersinnaavaa.
Tassami Nina Kreutzmann Jørgensenip neqeroorutigisimavaa akunnermi ataatsimi eqqiaaneq imaluunniit angerlarsimaffimmi inimi qanimut tapiinermut qujassutitut tusarnaartitsineq.
Kisiannili Jacob Froberg allaqqinnaamik pilersaaruteqarpoq.
- Taakku tamaasa perusunngilai. Arctic Sounds Festivalimut aappaagu takkunnissara qulakkiiginnarusuppaa, Nina Kreutzmann Jørgensen nassuiaavoq.
Angungajallugu
Arnakkuluk Jo Kleistip 20.050 koruunit katersorlugit angumeraa, 25.000 koruunit anguniarsimagaluarlugit.
Taassuma septemberip arfernani katersuiniarnini aallartippaa, katersugaalu Syriami eqqaanilu ikiuinissamut tunniunneqassapput.
Atuaruk: Nina Arnakkulullu Syriamut aningaasanik katersuiniarput