Nikkulaammut tatiginnikkunnaartut amerliartorput
Inatsisartuni aalisarnermut ataatsimiititaliap Aalisarnermut Naalakkersuisumut, Nikkulaat Jeremiassenimut tallimanngormat tatiginnikkunnaarlutik nalunaaruteqareernerata kingorna, Inatsisartuni tatiginnikkunnaartut amerliartorput.
- Taamaammat Aalisarnermut, Piniarnermut Nunalerinermullu Naalakkersuisup Ataatsimiititaliamit tatigineerunnera Aalisarnermut, Piniarnermut Nunalerinermullu Ataatsimiititaliap Inatsisartunut ilaasortanut tamanut inuiaqatigiinnullu ilisimatitsissutigisariaqalerpaa.
Inatsisartuni aalisarnermut, piniarnermut nunalerinermullu ataatsimiititaliamit nalunaarut sakkortooq, Nunatsinni tusagassiutinut tallimanngornermi apriilip tallimaani ualilluinnaraa nalunaaqutaq arfinermut qiteqquttoq nassiunneqarpoq.
Ataatsimiititaliami ilaasortat arfineq-marluk ukuusut Henrik Fleischer (S), Karl-Kristian Kruse (S), Mala Høy Kúko (S), Aqqaluaq B. Egede (IA), Múte B. Egede (IA), Steen Lynge (D) aamma Hans Enoksen (PN) ataatsimoorlutik tatiginnikkunnaarput.
Ataatsimiititaliap tatiginnikkunnaarnerminut tunngavilersuutigaa aalisarnermut naalakkersuisoq, Nikkulaat Jeremiassen (S) toqqaannartumik imminut assortortumik oqaaseqartarsimammat. Paragraf 37 atorlugu apeqquteqaammut akissutimini qaleralinnik aalisarpallaartoqarsinnaaneranik oqariartuuteqareerluni, kingorna tusagassiutimit apersorneqarnermini erseqqissaavoq piujuaannartitsinissaq tunngavigalugu aalisartoqartoq.
Partiit qanoq oqarpat
Tatiginnikkunnaarneq Inatsisartuni siarualertortutut isikkoqarpoq.
IA-p siulittaasua Múte B. Egede Sermitsiaq.AG-mut naatsumik nalunaaruteqarpoq, allalluni Inuit Ataqatigiit ataatsimiititaliap Nikkulaat Jeremiassenimut tatiginnikkunnaarnera pillugu isummerneratulli isumaqartut.
- Ataatsimiititaliap isummernera isumaqatigaarput, Múte B. Egede oqarpoq.
Inuit Ataqatigiit Inatsisartuni arfineq-pingasunik ilaasortaatitaqarput.
Arlallit ataasinngornermi nalunaassapput
Partii Naleqqap suliaq ataasinngornermi ataatsimiissutigissallugu nalunaarutigaa. Pele Broberg Sermitsiaq.AG-mut ilisimatitsivoq partii ataatsimiititaliatulli isumaqaratarsinnaasoq partiip siulittaasua Hans Enoksen ataatsimiititaliami ilaasortaanera pissutigalugu. Partiili ersarinnerusumik ataasinngornermi nalunaaruteqarumaarpoq.
Partii Naleraq Inatsisartuni pingasunik ilaasortaatitaqarpoq.
Siumut Inatsisartuni gruppia Nikkulaat Jeremiassenip inissisimanera pillugu suli isummeratik nalunaarput. Karl-Kristian Kruse KNR-imut ilisimatitsivoq partii ataasinngornermi ataatsimiikkumaartoq, namminerli Siumumut qanoq innersuussissanerluni oqaatigiumanagu.
Partii Naalakkersuisunik tapersersuisoq, Demokraatit, Sermitsiaq.AG-mut ilisimatitsivoq partiip suliaq oqaluuserereersimagaat.
- Piareerutta avammut nalunaaruteqarumaarpugut, Randi Vestergaard Evaldsen ilisimatitsivoq, naatsorsuutiginerarlugulu sapaatip akunnerata aallartilaarnerani tamanna piumaartoq.
Suleqatigiissitsisut ataasinngornermi nalunaassanerarput.
Sermitsiaq.AG-p Nunatta Qitornai Atassullu oqaaseqartinniarsimagaluarpai, iluatsinnaguli.
Sermitsiaq.AG-p ilanngullugu Naalakkersuisut Siulittaasuat, Kim Kielsen (S) ataatsimiititaliap tatiginnikkunnaarnera pillugu oqaaseqartinniarsimagaluarpaa. Saaffiginninnerilli maannamut suli akineqanngillat.