Nikku: Inatsisartut ataartsimiittarfiat Ilulissanut inissinneqarli

Inatsisartut Allaffeqarfiat sumi inissisimassanersoq Nuummi oqallisigineqarpoq. Partii Inuilli ataatsimiittarfiup illoqarfimmi allami inissisimanissaa siunnersuutigaat. Inatsisartut Allattoqarfiat Ilulissani inissisimassasoq Partii Inuinit siunnersuutigineqarpoq.

Inatsisartut amerlanerussuteqartut ukioq kingulleq isumaqatigiissutigaat Inatsisartut nutaamik ataatsimiittarfittaassasut. Namminersortunit aningaasalersorneqassasoq isumaqatigiissutigineqarpoq, tassani Illuut A/S-ip ataatsimiittarfissamut sananermini aningaasanik suliffeqarfik attartussasoq isumaqatigiissutigineqarluni, taannalu ukiuni 30-ni atuutissasoq siunnerfigineqarluni.

Ottawa Nunarpullu
Inatsisartut Allattoqarfiat Aqqaluup aneerasaartarfiani Nuummiittumi inissinneqassasoq siunnersuuteqarpoq, tamanna Nuummi innuttaasunit akerlerineqaqaaq.

Partii Inuisa siulittaasuata Nikku Olsenip Inatsisartut Allaffeqarfiat Ilulissani inissinneqarnissaa siunnersuutigaa.

- Canada assersuutitut taasinnaavarput. Toronto aamma Montreal illoqarfissuupput, Ottawamili ataatsimiittarfik inissisimavoq. Nunatsinni aamma taamatut inissinneqarsinnaavoq. Ilulissat suliffissatigut uummaarissuuvoq, aalisartoqarfiullunilu takornariaqarfiullunilu. Taamaattumik ataatsimiittarfiup Ilulissani inissinneqarnissaa tulluarpoq, Nikku Olsen Sermitsiaq.AG-imut oqarpoq.

Ataatsimiittarfiup sumi inissisimassanersoq pingaaruteqanngitsoq oqaatigaa, oqallinnerilli pingaaruteqarnerusut Partii Inuinit pingaartinneqarneruvoq.

- Inatsisartut ataatsimiittarfiat sumi inissisimassanersoq inuiaqatigiinnit oqallisigineqartariaqarpoq. Sumi inissisimassanersoq annertunerusumik inuiaqatigiinnit oqallisigineqarnikuunngilaq. Siunissarput pillugu siammasinnerusumik oqallittoqartariaqarpoq, Nikku Olsen oqarpoq.