Nike Berthelsen naalakkersuisoqarfimmi pisortanngussasoq
Kirsten L. Fencker naalakkersuisoqarfimmnini pisortassamik nutaamik nassaarsimavoq. Nike Berthelsen Qeqqata Kommuniani Atugarissaanermut immikkoortortaqarfimmi maanna pisortaavoq. Ulloq 1. februar 2022 pisortatut atorfik suliffigilissavaa.
Nike Berthelsen ulloq 1. februar 2022 Peqqissutsimut Naalakkersuisoqarfimmi pisortanngussaaq.
Naalakkersuisoqarfimmi pisortanngortussaq 43-nik ukiulik Qeqqata Kommuniani Atugarissaarnermut immikkoortortaqarfimmi pisortatut maanna sulisuuvoq. Qeqqata Kommuni Atugarissaanermut immikkoortortaqarfimmi 2020-mi martsip qaammataanili pisortaavoq, siusinnerusukkullu Peqatigiiffik Kalaallit Meerartaasa allattoqarfiani pisortaasimalluni.
- Nike Berthelsenip suleqatigilernissaa qilanaarisorujussuuarput. Piginnaaneqarluartuuvoq, pisortatut sulinermik ukiuni arlalinni misilittagaqarpoq pisortanillu sullissinermik peqatigiiffiillu aqqutigalugit kajumissutsimillu sulinermik misilittagaqarluarluni, Peqqissutsimut Naalakkersuisoq Kirsten L. Fencker tusagassiorfinnut nalunaaruteqarnermi oqarpoq.
Nutaanik unammilligassaqalernissamut qilanaartoq
Nike Berthelsen Qeqqata Kommuniani Atugarissaarnermut Immikkoortortaqarfimmi pisortatut atorfeqarsimavoq, tassanilu sulinermini ilaatigut suliffiup ineriartortinnissaa, kommunit tamarmik akunnerminni namminersorlutik oqartussanillu suleqateqarnerisa pitsanngortinnissaat, innuttaasunik attaveqartarnerit pitsaanerulernissaat, siunnersuisarnerit ilitsersuisarnerillu pitsaanerulernissaat kiisalu immikkoortortaqarfiit ataasiakkaat Qeqqata Kommuniata anguniagai naapertorlugit sulisarnissaat ukkatarisimavai, Namminersorlutik Oqartussat allapput.
Nike Berthelsen naalakkersuisoqarfimmi nutaanik unammilligassaqalernissaminut qilanaarpoq:
- Suliassakka aallartillugit sulilernissara qilanaarisorujussuuara. Kalaallit Nunaat peqqissutsimut tunngatillugu annertoorujussuarnik unammilligassaqarpoq. Suliassaqarfimmut tunngatillugu suliniutit pitsaasut arlallit aallartinneqareerput, tamakkulu misissortussaassavagut ineriartorteqqillugillu, Nike Berthelsen oqarpoq.