Nikanarsagaalluni qaninniarfigitinnerit AK-p misissuiffigilerpai
Atorfillit Kattuffiata ilaasortani 1300-nik ikinnerunngitsut nikanarsagaalluni qaninniarfigitissimanersut pillugit misissuiffileruttorpai. Maannamut akisimasunit 10 procentii apeqqummut angersimapput.
Atorfillit Kattuffiata, AK-p, ilaasortani 1300-nit amerlanerulaartut apeqqutinik akisassanik nassitsiffigisimavai. AK-mmi paaserusuppaa ilaasortani suliffimminni nikanarsarneqarlutik qaninniarfigitissimanersut.
Apeqqutinik akisassanik nassitsittunit 146-it sisamanngornermi 26. november akissuteqareersimapput. Taakkunannga 9,59 procentit akisimapput suliffimmi nikanarsagaalluni qaninniarfigitinnermik misigisaqarsimallutik.
– Killissamik qaangiilluni qaninniartoqartarneranik ilaasortat misigisaat misilittagaallu, kiisalu ajornartorsiutip qanoq iliuuseqarfigineqartarnera, paaserusuppagut. Misissuinikkut ilaasortat killissamik qaangiiffigitissimasut namminnerluunniit qaangiisimasut pitsaanerpaamik ikiorneqarnissaannik siunnersorsinnaalissavagut, taamaaliornikkullu killissamik qaangiisarnernik unitsitseqataasinnaalluta, Dina Olsen tusagassiorfinnut nalunaaruteqarluni oqarpoq.
Ukkatarineqangaatsiarpoq
Kissaatiginngisamik tiinganiarfigitinneq, imaluunniit nikanarsangaalluni qaninniarfigitinneq ukiuni kingullerni oqallisigineqangaatsiarlunilu, taamatullu iliorsimasutut taaneqartut ilaannut kinguneqarsimalluni. Siumumi partiip allatsigisimasaa Mikael Petersen taama iliorsimasutut taaneqareernermi kingorna suliunnaartinneqarallarpoq, namminerlu soraarniuteqarluni.
AK-p maanna paaserusuppaa ilaasortat qassit nikanarsarneqarlutik qaninniarfigitissimanersut, aammalu ilaasortat qassit namminneq taama qaninniarsimanersut.
Ilaasortat amerlanerpaartaat pisortat suliffeqarfiini atorfeqarput, soorlu kommunimi aamma Namminersorlutik Oqartussani. Siulittaasullu nalilerpaa misissuineq pisortat suliffeqarfiutaanni pissutsinik aamma takutitsisinnaajumaartoq.
– Sulisitsisunut saaffiginninnissatsinnut toqqammavissaqarlualissaagut, minnerunngitsumillu ajornartorsiutip unitsinnissaanut pinaveersaartinnissaanullu siunnersuuteqarsinnaalissalluta, Dina Olsen oqarpoq.
Siulittaasup neriuutigaa ilaasortat amerlanerpaat apeqqutinik akinissamut peqataajumaartut. Ilaasortanut paasiniaaneq 4. januar 2021 tungaanut ingerlanneqarpoq.