Niisarnaq pisareriarlugu qimaannarneqarsimasoq
Qeqertarsuatsiaani piniartut arlallit niisarnaq pisareriarlugu mattattaanillu ilanngaafigilaariarlugu qimaannarneqarsimasoq pillugu asseq Facebookikkut saqqummiunneqarsimasoq akuersaarsinnaanngilluinnarpaat. Taamatut iliortoqartarnerata pineqaatissiissutigineqartalernissaanut inatsisissaq naalakkersuisoqarfimmit suliarineqarpoq.
Assit arlallit Facebookikkut ingerlaartinneqartut malillugit takuneqarsinnaavoq, niisarneq mattattaanik ilanngaaffigineqalaaginnarsimalluni imaani toqungasoq. Arfeq aallaallugu toqunneqarsimavoq, tamatumalu kingorna neqaa sinneralu imaanut qimaannarneqarsimallutik, tamanna pisarineqartup tamarmiusup atorneqartarnissaa pillugu inatsimmut akerliulluinnarpoq.
Inuussutissarsiutigalugu piniartup Søren Rosingip Qeqertarsuatsiaaneersup inuussutissarsiutigalugu piniartut allat peqatigalugit assit saqqummiullugit taamatut pisoqarsimanera assuarilluinnarpaat.
- Inuussutissarsiutigalugu piniartutut uumasoq aallaallugu toqoriarlugu neqitaanik tigusinngivilluni qimaannarneqarsimanera takullugu kanngunaqaaq, piniartoq oqarpoq.
Piniarnermi ileqqulunneq
Piniarnermut Aalisarnermullu Naalakkersuisoqarfimmi pisortap Amalie Jessenip erseqqissaassutigaa, inuit inuussutissarsiutigalugu piniartutut allagartallit taamatut piniarnermi ileqqululluinnartumik pissuseqartoqartarneranik akerliliisartut Naalakkersuisoqarfimmit nuannaarutigineqartartut.
Naalakkersuisoqarfiup ukioq manna siusinnerusukkut innersuussutiginikuuaa, Arfernik mikisunik, aamma niisarnanik pisaqarsimanermik nalunaarutiginninnissap saniatigut pisarisap pisaqarfimmiit nassarlugu angerlaanneqartarnissaa, immikkoortortaqarfimmi pisortaq oqarpoq.
- Naalakkersuisoqarfimmit taamatut pissusilersortoqartarnera piniarnermi ileqqululluinnartutut isigineqarpoq, Amalie Jessen suliaq pillugu Sermitsiaq.AG-mut allakkatigut akissuteqarluni allappoq.
Pisortap ilisimatitsissutigaa, arfernik mikinerusunik allanik (qilalukkanik qaqortaanngitsunik qernertaanngitsunillu) illersuillunilu piniartarnissaq pillugit inatsisissatut missingiummik naalakkersuisoqarfik suliaqartoq, inatsisissaq malillugu akuersaarneqarsinnaanngitsumik pisoqartillugu pineqaatissiisoqartalissaaq, soorlu assersuutigalugu pisarisamik tamakkiisumik atuinissamut piumasaqaammik avaqqutsisoqarsimatillugu.
Suliaq kommunimut ingerlateqqinneqartoq
Piniarlunilu aallaaniartarneq pillugit Inatsisartut inatsisaanni kiisalu piniarsinnaanermut allagaqartat pillugit nalunaarutini taamaallaat maannakkut pisarisimasanik nalunaaruteqartarnissaq inatsisitigut pisussaaffigineqarpoq.
- Unioqqutitsisoqarsimaneranik pasitsaassanik nalunaarutiginnittoqaraangat, kommunimut inerteqqutaasumik iliuuseqarfiusimasumut saaffiginninnitsigut misissuisarpugut. Sumiiffimmi piniarnermik nakkutilliisoqaraangat taakku saaffigisarpavut qulaajaasoqarnissaanut ikiortiseralugit. Tamatuma saniatigut pisarineqarsimasoq nalunaarutigineqarsimanersoq misissortarparput.
Inatsit malillugu sunngiffimmi piniarnissamut allagartallit imaluunniit inuussutissarsiutigalugu piniartutut allagartallit pisaminnik nalunaaruteqartussaapput, tassunga ilanngulligit arferit mikinerit pisarineqarneranni. Suliamut matumunnga atatillugu Naalakkersuisoqarfimmit kommuni pineqartoq qinnuigisimavarput, nunaqarfimmi piniartunut/aalisartunut eqqaasissutigeqqusimavarput, niisarnat pisarineqarsimasut tamarmik Piniarnermi ukiumut immersortagaq aqqutigalugu nalunaaruteqartarnissaannik.