NIIK: Innarluutillit pillugit inatsit Naalakkersuisut atuutilersittariaqarpaat
NIIK (Nunatsinni Inuit Innarluutillit Kattuffiata) innarluutillit pillugit inatsisip atuutilernissaa piumasaraa. Naalakkersuisut nutaat pissaanermik tigusimmatali kattuffik suli tusagaqanngilaq.
OBS: Allaaserisaq nalunaaqutaq 15:50 aaqqinneqarpoq. Cecilie Marie Jakobsen Sugisap siulersuisuini ilaasortaavoq peqatigiiffimmilu siulittaasuunani. Allaaserisap siuliani siulittaasutut allaqqanera peernqarput (red.)
NIIK-mi siulittaasoq nutaaq, Cecilie Marie Jakobsen Naalakkersuisut iliuuseqarnissaannik piumasaqarpoq. NIIK peqatigiiffinnut inunnik innarluutillit soqutigisaannik ingerlatsisunut kattuffiuvoq. Ilaatigut ukunungna ISI, Sugisaq, Inooqat aamma Autismeqartut peqatigiiffiat.
Inuit innarluutillit illersuisuanit Tiliumit nalunaarusiap takutippaa, 249-nik Tiliumut 2020-mi saaffiginnittoqarsimasoq. Tamanna 2019-mit 40-nik qaffariarneruvoq.
- Nalunaarusiaq tupaallannartuunngitsoq, NIIK-mi siulittaasutut oqarusuppunga. Inuit innarluutillit ajornartorsiutit aalajangersimasut taakku misigisareerpaat. Tiliumut saaffiginninnerit affaasa missaat ikorfartuinermut aamma ikiorsiissutinut kissaateqarnermut kiisalu kommunip sulianik suliarinnittarnerinut tunngasut, nalunaarusiami inerniliunneqarpoq. Innarluutillit pillugit inatsisip atuutilerneqarnissaa Naalakkersuisunit nakkutigineqartariaqartoq, NIIK-mi isumaqarpugut. Innarluutilinnullu suliassaqarfimmi iliuuseqartoqarnissaanik Inatsisartut ujartuinissaat neriuutigaara.
NIIK politikerinik aggersaavoq
- Inuit innarluutillit atugaannik tamanik tunngaviusumik pitsanngorsaanissaq pisariaqartinneqarpoq, makku ilanngullugit: ineqarneq, suliffeqarneq, atuarneq sunngiffimmilu sammisassat, siulittaasoq nutaaq Cecilie Marie Jakobsen oqarpoq.
Taamaammat kattuffiup politikerit oqaloqatiginiarlugit aggersaavoq, politikerit taamaalillutik suliassaqarfik paasisaqarfiginerussammassuk.
- Naalakkersuisoqatigiit nutaat innarluutillit pillugit suliassaqarfiup aamma tarnimikkut nappaatillit pillugit suliassaqarfik kivinniarlugu isumaqatigiissuteqarnerat nuannaarutigaarput. Kisianni aalajangersimasunik oqariartuuteqartoqarnissaa suli utaqqivarput, NIIK-mi siulittaasoq oqarpoq.
Cecilie Marie Jakobsen kattuffimmi NIIK-mi siulittaasutut maajimi toqqarneqarpoq.
Kattuffiup Tiliullu akornanni pitsaasumik suleqatigiittoqartoq, kattummik ilisimatitsivoq. Kisianni nunatsinni inuit innarluutillit pillugit paasissutissanut tunngatillugu unammillernartoqarnerarpaat.
Nunatsinni inuit innarluutillit pillugit aamma tarnimikkut nappaatillit pillugit tunngaviusumik paasissutissat amigaatigineqartut, NIIK-mi siulittaasuusimasup ilisimatitsissutiginikuuaa.