Niels Thomsen sulinngiffeqarpoq
Demokraatit siulittaasuat Inatsisartuni ilaasortatut sulinngiffeqarniarluni aalajangerpoq
Inatsisartuni ilaasortaq aamma Demokraatini siulittaasoq Niels Thomsen peqqissutsimut tunngasoq pissutigalugu Inatsisartuni ilaasortatut sulinngiffeqarniarluni aalajangerpoq.
Juunip 30-ata tungaanut Inatsisartuni sulinngiffeqarniarluni aalajangersimasoq Demokraatit tusagassiutinut nalunaaruteqarput.
- . Uanga nammineq Inatsisartut oqaluttarfianut qaqillunga oqaaseqaleraangama qamuuna tulluusimaartaqaanga, taamaattumillu uannut imaannaasimanngilaq Inatsisartutut sulinngiffeqarallarnissara aalajangiuttariaqalerakku. Siunnersorneqarpunga maannakkuugallartoq imminut paaralunga eqqissisimaartariaqartunga - tamanna imminermini uannut imaannaanngilaq sulinerami nuannareqaara, allatulli ajornartumik siunnersorneqarnera naalattariaqarsimavara, Niels Thomsen tusagassiutinut nalunaarummi oqarpoq.
Niels Thomsenip sulinngiffeqarnerani Politikkimut akisussaalluni siulittaasumut Tullersortaasoq Randi Vestergaard Evaldsen aamma aaqqissuussaanermut akisussaalluni siulittaasumut tullersortaasoq NIvi Olsen suleqatigiillutik ulluinnarni partii siulersussagaat ilisimatitsissutigineqarpoq.
Demokraatini siulittaasup aalajangernini annertunerusumik oqaaseqarfigeqqikkumanngilaa.