Niels Thomsen RG-mi siulersuisunut ilanngutissasoq – siulittaasup tullia qinerneqaqqinngilaq
Demokraatini siulittaasuusimasup aamma Halibut Greenlandimi pisortaasimasup, Niels Harald de Coninck-Smith, Royal Greenlandip siulersuisuini kingoraassavaa.
Marlunngornermi Royal Greenlandimi ileqquusumik ataatsimeersuartoqarnerani ukiormassuarni siulittaasuusimasoq Niels Harald de Coninck-Smith qujaffigalugu ilaasortanngorteqqinniarnagu Naalakkersuisut aalajangerput.
2022-mi Maliina Abelsen siulittaasutut toqqarneqarpoq, taassumalu Niels Harald de Coninck-Smith ukiuni qulini siulittaasuusimasoq kingoraarpaa.
Inuussutissarsiornermik ingerlataqartoq siulersuisuni siulittaasup tulliatut ingerlaqqippoq, maannakkulli ilaasortaajunnaarpoq.
Naalakkersuisut siulittaasuata Múte B. Egedep (IA), ataatsimeersuartoqarnerani Niels Harald de Coninck-Smith ukiut ingerlanerani ingerlatseqatigiiffimmut sullissisimaneranut qujaffigaa.
Demokraatini siornatigut siulittaasuusimasoq Niels Thomsen Naalakkersuisut taartissatut toqqarpaat, taanna ilaatigut inuussutissarsiornikkut suliffeqarfimmi aalisarnermik ingerlatsivimmi Halibut Greenlandimi pisortatut 2011-mit 2020-mut misilittagaqarpoq. Aammattaaq 2020-miilli Kalaallit Airports Holdingimi siulittaasup tulliuvoq.
Niels Thomsenili Royal Greenlandimi siulersuisunut 2023-mi septembarip aallartinnerani sulisitsisorisimasaanit unammilleqatigiinnermut isumaqatigiissut qaangiuppat ilaasortanngussaaq, Naalakkersuisuni siulittaasoq, Múte B. Egede, marlunngornermi ataatsimeersuarnermi taama ilisimatitsivoq.