Nick Nielsen timersortartut kattuffiannit nersualaarneqarpoq

Naak ilaannit isumaqartoqaraluartoq Ilinniartitaanermut, ilageeqarnermut, kultureqarnermut naligiissitaanermullu naalakkersuisoq Nick Nielsenip Ruslandimi ukiuunerani OL-ernermut peqataasariaqanngikkaluartoq, Timersortartut Kattuffiata siulittaasuanit Nuka Kleemanimit naalakkersuisup peqataanera iluarisimaarneqarpoq.

- Piffissami angusaqarluarnissaq anguniartillugu kiisalu ataqatigiinnermi nukittuumi Kalaallit Nunaanni Timersortartut Kattuffiannit ilinniartitaanermut, ilageeqarnermut, kultureqarnermut naligiissitaanermullu naalakkersuisup OL-imut peqataatitatsinnut Martin Møllerimut illersuiartorneranut peqataanera nuannaarutigaarput. Nammineq erfalasorput atorlugu siunissami peqataarusunnitsinnut naalakkersuisup OL-imi peqataaneratigut takutinneqarpoq suliaq pimoorullugu ingerlanneqartoq, Kalaallit Nunaanni Timersortartut Kattuffiannit oqaatigineqarpoq.

- Nammineq erfalasoq atorlugu unammeqataasalernissaq suliaq annertuvoq, peqataarusunnermilli kajumissusilimmik peqataaffigigaanni, eqqarsaat anguniarlugu sulisoqartariaqarpoq. Taamaattumik naalakkersuisup Nick Nielsenip Sochiliarnera nuannaarutigaarput, tassani aamma Kalaallit Nunaat timersornikkut nunarsuarmioqatitsinnut takutissagatsigu.

Nuka Kleemanip aamma oqaatigaa, kalaallit peqataatitaqarnerat takutinneqartariaqartoq.

- Naalakkersuisut unamminernut aallartitaqartut takusareerparput, soorlu ukiuunerani OL-imi Nagano-mi ingerlanneqartumi aallartitaqareersut. Ukiummi sisamakkaarlugit kisimi unammisoqartarpoq. Nunatsinni timersornerup ineriartorteqqinnissaa naalakkersuisoq Nick Nielsen oqaloqatigisarparput, atugassarititaasut pitsanngornissaat angorusuppagut, taamaattumik naalakkersuisup qanimut suleqatiginissaa pingaartipparput, Nuka Kleeman oqarpoq.

Nuka Kleemanillu oqaatigaa nunatsinni nammineq piumassusertik atorlugu sungiusaasut, peqatigiiffinnik aqutsisut ikiuuttartullu akunnerpassuit atorlugit suliaqartartut.

- Ataqatigiissaarinikkut, timersortarfimmik attartornikkut, unammisartut, siulersuisuni ataatsimiinnerit, paasissutissiineq namminerlu piumassuseq atorlugu suleqataasut. Aamma angalanissanut piareersaasoqartarpoq, unammisitsinernut aningaasanillu taperseerusuttunut ujaarlernermi sulisoqartarluni. Akunnerpassuit atorneqartarput piumassutsimik sulinermi, timersornerlu aqqutigalugu meeqqat inuusuttullu siuarsarneqartarput. Naalakkersuisup OL-imut angalanera timersornermut tapersersuinini takutippaa. Nammineq piumassutsimik sulisut pillugit suliniummik annertuumik aallartitsinikuuvugut, ineriartorteqqinnissaalu anguniarlugu oqaloqatigiinnerit ingerlaqqissapput, Nuka Kleeman angalanermut peqataasinnaanngitsoq oqarpoq.