paarlaaneq
Nick Nielsen: Suliamut tunngatillugu paasinngisakka arlaliupput
Facebookikkut kisimi isummersoreerluni Siumut tunuliaqutaralugu Folketingimi ilaasortaajunnaarnini pillugu oqaaseqarpoq
- Taamatut tunuartitaaninnut suna tunngavippiarineraa paasisinnaanngilara.
Nick Nielsen Radioavisimit apersorneqarami oqarpoq.
Siumumit Nick Nielsen Folketingimi ilaasortaajunnaareernermi kingorna oqaaseqarpoq. Siumup qullersaqarfianit Mikael Petersenimit mailimik allagarsivoq marlunngormat. Tassani Doris Jakobsen folketingimi ilaasortaaleqqinnera nalunaarutigineqarpoq, taamaasillunilu Nick Nielsen Folketingimi ilaasortaajunnaarluni.
Nick Nielsenip nassuiatigaa, tunuartitaanerminut tunngaviusoq paasisinnaanagu.
- Assigiinngitsunik saqqummiussisoqarpoq. Mianersortumik oqarpunga: suleqatigiittoqarsimasoq ilimagaara, uani oqanngilanga qanimut suleqatigiittoqarsimasoq. Taamak oqanngisaannarnikuuvunga. Oqaaseqaatigisimasakka tamarmik folketingip nittartagaanniit aaneqarsinnaapput, Nick Nielsen Pituffik pillugu suliamut tunngatillugu KNR-imut oqarpoq.
Naqqiissuteqartoqannginnissaa pillugu Nunanut allanut tunngasunut naalakkersuisorlu Vittus Qujaukitsorlu aalajangersimallutik Nick Nielsen oqarpoq. Taamaakkaluartoq Siumumi siulittaasumit Naalakkersuisullu siulittaasuanit Kim Kielsenimit akuersaarneqanngilaq.
Isumaqatigiinngissutaasut
AG sapaatip akunnerani saqqummersumi allappoq Naalakkersuisut siulittaasuata naalakkersuisoqarfiani pisortaasoq Svend Hardenberg Kim Kielsen peqatigalugu oqallinneq TV-kkut nuummit Folketingimi Pituffik pillugu kiffartuussinissamut isumaqatigiissutip annaaneqarsimanerata ataatsimiissutigineqarnera malinnaaffigigaat. Oqallinnermi Vittus Qujaukitsoq Folketingimi oqallinneq malinnaaffigaa. Svend Hardenbergi Kim Kielseni peqatigalugu mailimik, AG-mit pissarsiarineqarsimasumi, Nick Nielsenimut allapput, ilaatigut ima allaqqasumik:
- Isumaqatigiissutissap nutaap isumaqatigiinniutigineqarneranut Naalakkersuisut akuutinneqarsimanerannik Nickip oqaasii tunngavigalugit taamaattoqannginneraallusi allagaqartariaqarpusi – Naalakkersuisut akuutinneqarsimanngillat. Nick nammineq Naalakkersuisuusimavoq siunnersuummillu allamilluunniit saqqummiussivigineqarsimanani, imaluunniit allaffeqarfimmut namminneq sinnerlutik isumaqatigiissutissap nutaap isumaqatigiinniutigineqarnissaanut piginnaatitsissummik tunniussaqarsimanani. Illit / Ilissi Vittusimut ataqatigiissaarinneqatiginnissinnaavusi. Nalunaarutip assinga Vittusimut nassiunneqarpoq.
Nick Nielsenip Folketingimut tunuartitaaneranut Kim Kielsen nassuiaateqarpoq Pituffik pillugu suliap takutikkaa Folketingimi ilaasortatut misilittagalimmik ilaasortaqartariaqarnera kiisalu aamma Naalakkersuisunik suleqatiginnissinnaanissaa pingaaruteqartuusoq.
Siumut oqaaseqarusunngitsoq
Kim Kielsen imaluunniit Nick Nielsen Sermitsiaq.AG-mit apersorneqarusunngillat.
Sermitsiaq.AG-mit paaserusunneqaraluarpoq Nick Nielsenimit kiisalu Naalakkersuisunit Naalakkersuisut siulittaasuatalu Naalakkersuisoqarfianit isumaqatigiinngittoqarnersoq. Tassani suliffeqarfiup Exelis Servicep oktobarip aallaqqaataani Pituffimmi kiffartuussinissamut isumaqatigiissutip atuutilernissaanut Naalakkersuisut suleqataasimanerannut atatillugu sulinermi Folketingimi ilaasortaasup allatut isumaqarnera paaserusunneqaraluarluni.
Aamma Sermitsiaq.AG-mit paaserusunneqaraluarpoq Siumumi politikkerip nammineerluni sulisimanini uggornartissimaneraa, aamma sooq Facebookimi sooq allannersoq soraarsitaanini sooq tupaallaatigineraa paaserusunneqaraluarluni.
Sinniisutut atorunnaarpoq
Nick Nielsen Folketingimi Siumut tunuliaqutaralugu qinigaanngitsoq maluginiarneqarsinnaavoq. Tassani Doris Jakobsen partiimi qinigassanngortittunit qinerneqarnerpaavoq Folketingimut qinersinermi 2011-mi. Naalakkersuisunit peqquneqarnini malillugu Folketingimi ilaasortanngorteqqinneqarpoq. Sinniisutut siullertut inissisimavoq Naalakkersuisuni ilaasortaq Vittus Qujaukitsoq, sinniisutut aappaattut Nick Nielsen inissisimalluni.
Doris Jakobsen 5.722-nit qinerneqarpoq Folketingimut qinersinermi 2011-mi, Vittus Qujaukitsoq 1318-nit qinerneqartoq kiisalu Nick Nielsen 801-nit qinerneqarluni.
Vittus Qujaukitsoq oqartinniarlugu Sermitsiaq.AG sulissuteqarpoq.
Pituffik pillugu suliaq Nick Nielsenip Folketingimut ilaasortaajunnaarneranut sooq sunniuteqarnersoq AG-mi sapaatip akunnerata matumani saqqummersumi atuarneqarsinnaavoq. Aviisi ataani pisiariuk: