Niaqornani angut 57-inik ukiulik toqutaasoq
Niaqornani angut 57-inik ukiulik aallaaneqareernermi kingorna toquvoq. Politiit toqutsinermut tunngatillugu tigusarinnipput.
Angut 57-inik ukiulik Uummannap pigisaani Niaqornani aallaatissimasoq politiit tallimanngornerup ualiani nalunaarfigineqarput. Politiit maanna toqutsinermut atatillugu tigusarinnissimalerput. Tigusarinninneq pisinnaasimavoq Niaqornani kommunefoged suleqatiginerasigut. Tigusarineqartoq maanna toqutsisimasutut unnerluunneqarpoq.
Politiit marluk nakorsarlu ataaseq Ilulissaniit Niaqornanut ullumi aallartinneqarput.
- Maanna pilersaarutaalerpoq toqusoq unnerluunneqartorlu Ilulissanut tikisinneqarnissaat. Tassani unnerluunneqartoq killisiorneqassaaq eqqartuusivimmullu sassartinneqassalluni. Taassuma saniatigut toqusup timaanik misissuisoqassaaq, taama pigaartut pisortaat Nûno Larsen tusagassiuutinut nalunaarummi paasissutissiivoq.
Politiit marluk nakorsarlu ataatsip saniatigut misissuisartut Rigspolitiets Nationalt Kriminalteknisk Centerimiit tikisitsisoqassaaq. Tassani misissuisartut marluk pinerluttoqartillugulu misissuisartoq tikisinneqassapput. Taakkua ataasinngorpat januarip 24-ani tikinnissaat naatsorsuutigineqarpoq.
- Misissuisoqarnissaa pillugu politiit annertunerusumik pisoq pillugu paasissutisseeqqissinnaanngillat, pigaartut pisortaa oqarpoq.