Aallarnisaaneq
NI-mi ilinniartut qulingiluat Danmarkimi aallarnisaanermik unammeqataalersut
Sisamanngorpat Niuernermik Ilinniarfimmeersut ilinniartut atuartullu, isumassarsiniarnermut unammilleqataassapput, Danish Entrepreneurship Award-imik taasami, ukioq manna Fredericiami ingerlasussami peqataassapput.
NI Nuummi atuartut ilinniartullu Danish Entrepreneurship Award-simi, aallarnisaanermik unammersuarfiusartumi, unammeqataapput.
Qaammatip ingerlanerani Nuuk Centerimi ingerlanneqartumi, Young Northern Light-imi, taakku pisinnaasalittut piukkunnaateqalersimapput, Arsarnerit Inuusuttaasa peqatigiivisa iluanni pissartanngorniarnermi ajugaasimanerisa kingorna.
Peqataasut
Ilinniartut ilaatinneqartussat tassaapput, Eva-Kathrine Dahl aamma Ivalo Olsen Møller, TNI-18-meersut, ajugaassutigaat Ungdomsuddannelse-mut pisaq. Taakku isumassarsiaraat neriniartarfimmik aallartitsinissaq kalaaliminernik tunisaqartartussaq.
Videregående Uddannelse-mut pisami ajugaasuupput Mikisoq Høy Labansen, Salik Olsen aamma Svend Karson, taakkulu akademiuddannelse-meersuupput, IT-ledelse aamma teknologip ataani.
- Taakku isumassarsiaraat programmi ataatsimoortoq, Kiffartuummik atsigaq, isumaqartoq ”kiffartuut”, Nuummi Niuernermik Ilinniarfik tusagassiuutinut nalunaarummi allappoq.
Paasissutissiineq
Ilutigalugu taannarpiaq programmi sulliviit kiffartuussisut, soorlu akunnittarfiit, neriniartarfiit, allaffissornikkut ingerlaviit kattullugit, tuniniaaneq tamatumanilu mailet oqarasuaatillu akissutissaannik utaqqineq sivikillineqassalluni.
- Nuummi massakkut susoqarneranik, sunissaminnillu takornariarpassuit illoqarfimmilu innuttaassut ilisimassallugu
ajornartorsiutigisarpaat. Suliffiit maili oqarasuaallu atorlugu piffissarujussuaq atorlugu pilersaarusiortarput
inniminniillutillu, illoqarfimmiut sulliviillu kattullugit siaruarterinernit peqannginnera pissutigalugu, peqataasut ilaat, Mikisoq Høy Labanse, oqarpoq.
Taassuma nassuiaatiminut ilannguppaa, siunissami teknikkip illoqarfimmi innuttaasunit ikiuinermi saniatigut aamma angallasseqatigiit, soorlu Air Greenland, Air Iceland kiisalu Arctic Umiaq Line ajornannginnerusumik ilaasut aqqutissaaruttut unnuiffissaannik nassaarnissamut, paasissutissiinernillu illoqarfimmiittariaqarnermi sulerisinnaanerinik ikiorsinnaalissammatigit.
Isumassarsiat pillugit katersuunnersuaq
Danish Entrepreneurship Award atuartunut ilinniartunullu isumassarsiat pillugit katersuuffiuvoq annertooq. Tassani inuusuttut alapernaatsut 7000-it sapiissusertik isumassarsiatillu misilittartarpaat. Inuussutissarsiutillit misilittagallit siunnersuinissaminnut tutsuiginartumillu isumasioqatigiinnissanut, taamaalillutillu inuusuttut pilersitsillaaqqaat isumassarsiamit nukittorsarnissaannut inuusuttullu nutaamik paasisaminnik angerlaassisinnaanissaannut, piareersimapput. Aallarniisutut inuuneq pillugu saqqummiussisut amerlaqisut oqaluttuarput, ilinniartitsisunullu ilinniartitsinissamut isumassarsinissanik peqaqaaq.
- Ulloq naggaserneqarpoq nalliuttorsiornermi takutitsinermik nuanneqisumik, tassani isumassarsiat pitsaanerpaat nalliuttorsiutigineqarput, tassami uani Eva-Kathrine, Ivalo, Mikisoq, Salik Svend-ilu qiimmassaammik nillerranneqassapput, nalunaarummi allassimavoq.
Peqataasut taakkulu ilinniartitsisui ullumi marlunngornermi Danmarkiliarput.