NGO: Innuttaasunik ataatsimiititsinernik ingerlatsineq isumaqanngilaq

Sooruku Naalakkersuisut Kujataani Greenland Mineralsip suliniutaa pillugu innuttaasunik ataatsimiititsinernik ingerlatsiniartut, tamatumunnga ilutigitillugu inatsisissatut siunnersuut tusarniaassutigineqartoq, tamatuma suliniut unitsivissammagu? Tamanna avatangiisinit illersuiniaqatigiit ippigaat.

Naalakkersuisut Kujataani Kuannersuarni suliniut pillugu innuttaasunik ataatsimiititsisarnerit ingerlanniarpaat piffissami augustip ulluisa 23-annit 29-annut atuinissamut akuersissuteqarnissaq pillugu suliap suliarineqarnera naapertorlugu.

Angalaqatigiit amerlangaatsiartut tassaasut politikkikkut akisussaasut aatsitassanut, avatangiisinut aamma peqqissutsimut: Naaja Nathanielsen (IA), Kalistat Lund (IA) aamma Kirsten Fencker (Naleraq) aammattaaq atorfillit malittaasut Kujataani illoqarfinni nunaqarfinnilu augustip naalernerani (23.-29. august) innuttaasunik ataatsimiititsisarnerni peqataassapput, Kuannersuarni suliniut pillugu tusarniaassuteqarnerup septembarip ulluisa 13-ianni naannginnerani.

Inuttaasunik ataatsimiititsisaqattaarnerit politikikkut akisussaasunit peqataaffigineqartut Greenland Minerals-ip suliniutaanik aatsitassat pillugit oqartussaasut suliaannut ilaavoq, tassa piiaanissamut akuersissuteqarnissap tungaanut, aviisi Sermitsiaq allappoq.

Taamaattorli tamanna ingiaqatigalugu Naalakkersuisut inatsisissatut siunnersuut tusarniaassutigaat Kalaallit Nunaanni uranimik misissueqqaarnermik, ujaasinermik aamma piiaarnermik unitsitsisussaq. Naalakkersuisut siunnersuutigaat killiussaq 100 ppm, tassa imaappoq malm 1 tonsiuppat uranimik 100 gramimik akua killeqassaaq.

Inatsisissatut siunnersuut akuerineqarpat taava Kuannersuarni Greenland Mineralsip suliniutaa unitsinneqarluinnassaaq, tassani 200-300 ppm akuummat. Taava sooq innuttaasunit ataatsimiititsisaqattaarnerit annertuut aamma akisuut ingerlanneqassappat, suliniut unitsinneqartussanngoreersoq?

– Innuttaasunik ataatsimiititsinnerit Naalakkersuisunit peqataaffigineqartut aatsitassat pillugit inatsimmi atuuttumi piumasaqaataapput aamma Naalakkersuisut inatsit malinniarpaat, aatsitassanut naalakkersuisut Naaja Nathanielsen Sermitsiamut akissuteqarpoq.

Allaaserisaq tamaat uani Sermitsiami pisiarisinnaasanni atuaruk:

Powered by Labrador CMS