New Yorkip anertikkartippaanga – nuannersumik nuanniitsumillu
Ukiuni kingullerni marlunni Mira Naalagaaffiit Peqatigiit New Yorkimi qullersaqarfianni nunat inoqqaavisa pisinnaatitaaffiinik suliaqarsimavoq. Ukiuni marlunni illoqarfimmi naassaanngitsumik pisoqarfiujuaannartumi nipiliortuaannartumilu, corona-virusi takkummat tassanngaannaq nipaaruteriataartumi. Ukiut marluk nunat inoqqaavinik isumassarsiffiusunik ataatsimeeqateqartarnerit, pissusiviusunillu killitsinnartunik naapitsisarfiusimasut. Oktobarip aallaqqaataani Naalagaaffiit Peqatigiit New Yorkilu qimassavai, paasisanik misigisanillu nalissaqanngitsumik pissarsiffigisimallugit.
Ukiut marluk matuma siornatigut Nuummi inissiaq najugaqarfiga, Ukkusissanut Quassussuarmullu isikkivilik imaajarpara, New Yorkimullu nuullunga illorsuarnut portusuunut isikkiveqalerlunga. Maanna New Yorkimi najugara imaajarpara angerlartussanngorama. Suliakka pillugit Atuagagdliutini ataavartumik allaaserisaqartarsimavunga, nunat inoqqaavisa pisinnaatitaaffii pillugit, New Yorkimi najugaqarluni qanoq innersoq corona-virusilu pillugu. Ukiuni marlunni misigisimasakka tupinnaannartut, nalissaqanngitsulli uani eqiterlugit oqaluttuarilaassavakka.
New Yorkiliarpunga Naalagaaffiit Peqatigiit Nunat Inoqqaavinut Oqaloqatiginnittarfianni juniorrådgiveritut suliartorlunga. Allaffitsinni ilaatigut suliassaraarput Naalagaaffiit Peqatigiit iluanni avataanilu nunat inoqqaavisa pisinnaatitaaffii siuarsassallugit tapersersussallugillu. Nunarsuup immikkoortuini tamani nunat inoqqaavi 477 millionit missaanniipput. Inuit tamakkua tamarmik pisinnaatitaaffii sammineqassapput illersorneqarlutillu allaffimmit qulinik sulisulimmit, uangalu aperineqassaguma tamanna sapernarluinnarpoq. Pingaartumik nunat inoqqaavisa amerlasuut unammilligassarujussui eqqarsaatigissagaanni.
Corona-virusi atugaalermalli allaffipput nunat inoqqaavinit nalunaarfigineqartarpoq ajornartorsiutilerujussuullutik. Amerlasuut napparsimmaviliarsinnaanngillat, amerlasuut nappaat nunuarsuarmi tuniluuttoq pillugu nammineq oqaatsitik atorlugit paasissutissanik pissarsisinnaanngillat, ilaallu allaat qaqorsaatinik imermillu amigaateqarput, pisariaqarluinnartumik nappaatip tuniluunnerata pinngitsoortinniarnissaanut. Ajornerusorlu tassaavoq sumiiffiit ilaanni naalakkersuisut nappaat nunarsuarmi tuniluuttoq tunngavilersuutigalugu nunat inoqqaavisa territoriaannut isertarsimapput, namminnerlu nerisassaminnik naatitsinissamut periarfissaannik arsaarlugit. Tamannalu pivoq piffissami, nunat inoqqaavi amerlasuut avataanit nerisassarsiorniarlutik nunaminnik qimatsisinnaanngiffianni.
Mira Kleistip USA-mi misigisai aviisimi AG-mi atuakkit. Aviisi uani pisiarineqarsinnaavoq: