New York Times: 2020-mi Kalaallit Nunaannut angalagit
New York Times nunanut angalaffiusinnaasunut ukiumoortumik innersuussineranut Kalaallit Nunaat ilannguppoq. Nunat angalaffissat innersuunneqartut katillugit 52-iupput.
New York Timesip atuartartui miliuunilikkaat Kalaallit Nunaannut ukioq manna angalanissamik innersuunneqarput.
Nunat angalaffissatut innersuunneqartut ilagaat Bolivia, Washington, Tokyo aamma Israel, Kalaallit Nunaallu angalaffissatut piukkunnartunut ilanngunneqarluni.
Præsident Donald Trumpip Kalaallit Nunaannik pisiariumanninnera suli akisuasuusivoq, nunallu soqutigineqarnerulerneranik kinguneqarluni.
- Præsident Trumpip Kalaallit Nunaannik, danskit naalagaaffiata ataani namminersorluni ingerlasumik pisiniarluni kissaateqarnera quiassuaatigineqarpoq, naalagaaffiit akornanni suleqatigiinnernut uivertitsilluni – qeqertallu tikinneqajuittup tikeraarneqarnerulernissaanut soqutiginnitsitsilerluni, New York Times allappoq.
- Sermersuaq Ilulissat kangerluaniittoq takujuk, UNESCOp nunarsuarmut kingornussassatut allattorsimaffianut ilaasoq.
- Sermersuaq issusoorsuugaluarluni sukkasuumik aakkiartorpoq, mittarfissuillu 2023-mi atulertussatut naatsorsuutigineqarlutik. Taamaammat Kalaallit Nunaat allanngorneqanngitsup misigisassarsiorfiginissaanut maannakkorpiaq periarfissaqarputit, New York Times innersuussinermini allappoq.
Nunat allat New York Times 2020-mi angalaffissatut innersuussutai nittartagaani atuarsinnaavatit.