Skip to main content

Netlederi: Aajap Aki-Mathildallu aallartinnissaannut kajumissaarut

IA-miit Siumumiillu folketingimi ilaasortat marluk Danmarkimi naalakkersuisunik pilersitsinermut sunniuteqassanngillat. Saamerliit amerlanerussuteqarput.

Siumumiit nutaajulluni qineqqusaarngaartoq Aki-Mathilda Høegh-Dam aamma IA-meersoq misilittagartooq qinigaaqqittoq, Aaja Chemnitz Larsen, qinigaammata danskit naalakkersuinermik ingerlatsivianni nunarput sinnerlugu saamerlerneersunik sinniisoqarnermut uteqqippugut. Folketingimi ilaasortat uku marluk Danmarkip politikkikkut inissisimaneranut naleqqiullugu pappialatigut isumalluarnartumik sulinermi atugassaqarniarpasipput. Lars Løkke Rasmussenillu naalakkersuinermi pissaanerminik annaasaqarnerata kingorna Socialdemokratiit siulittaasuat Mette Frederiksen naalakkersuisunik pilersitsissaaq. Socialdemokrati isummanut tunngavigisatigut assingusumik politikkikkut Siumut suleqatigaa, aammattaarli IA ungasinngilaa.

Kisianni Atlantikup Avannaaneersut ilaasortaatitat sisamat – Savalimmiuni saamerliit talerperliillu tamarmik immikkut folketingimi ilaasortaqarput – naalakkersuisunik pilersitsinermut aalajangiisuusumik sunniuteqarnissartik sinnattoriinnarsinnaavaat. Partiit saamerliit danskit namminneq taaguunneqarnerit 91-it pissarsiarisinnaavaat. Aammattaaq Venstre-p Socialdemokratiillu qeqqani naapinnissaat ilimanaateqarpoq. Partiit taakkua marluk amerlanerussuteqarnissaminnut taaguunneqarnerat naammappoq. Kisianni ilusilersugaq taama ikkaluartoq neriulluartoqassaaq. Qinikkatut naalakkersuisoqatigiit maanna tunualersut Kalaallit Nunaat suleqatiginerani kinguneqartitsineq takutissimavaat, taakkua akornanni Naalakkersuisut kissaatigisimasaannik mittarfittaassanut aningaasaliineq ilagaat.

Kisianni Aki-Mathildap Aajallu ullormut suliarisartagaannut ilaareerput: ilungersorneq naalakkersuinermilu pissutsinik ilisimasaqarneq, kalaallit soqutigisaat angusinnaajumallugit.

Qinersisartut ersarissumik isumaqarput suliassaq taanna Aleqa Hammondip folketingimi qinigaaffiup siuliani aaqqiissuteqarfigerpiarsimanngikkaa. Politikereq isummanik akerleriiffigineqartoq qinigaaqqinnissaa ungasissimavoq, soorlu siorna Nunatta Qitornaanniit Inatsisartunut qinersinermi qinigassanngortimmat qinersisartunit tununneqartoq. Tamanna siornatigut politikeri nuimasuunikumut politikkimik suliaqarluni ukiuni arlalinni misilittagaqartumut immikkut ittuuvoq, Siumumut Naalakkersuisunullu siulittaasuunikoq.

Demokraatit, taaguunneqarnerit pingajuat, partiini Partii Nalerarlu siuariarput, Siumut IA-lu kinguariartut, kisianni suli taaguunneqarluarnerpaajullutik.

Aki-Mathila Høegh-Damip Aaja Chemnitz Larsenillu nukittuumik suleqatigiilernissaat nunatsinnilu politikkimi assortuussutaasunik qulangerneqannginnissaat pisariaqarpoq. Tamanna akissaqartinneqanngilaq. Chemnitzip uppernarsareerpaa ilungersornikkut suliamik tunniussineq angusaqarfiusartoq. IA Siumullu siuliatigut Folketingimi suleqatigiittareerput. Oqaluttuarisaanermi utilaarutta Lars-Emil Johansen Kuupik Kleistilu taamanikkut Nordatlantiske Gruppe-mi uissuumminartumik angusaqarput tassanilu folketingimi ilaasortaq Høgni Hoydal ilaavoq.

Suli aporfeqarlunilu unammilligassaqaqaaq, politikkikkut assut maluginiarneqartussanik ataatsimullu sassarfigineqartussanik. Taakkua akornaniippoq USA-p Kalaallit Nunannut attaveqarneranut tunngasoq,  Greenland Contractors aamma Royal Arctic Line-p Thule Air Base-mut sullissinissamut isumaqatigiissut annaanerannut taarsiiffigineqarnissamik anguniagaq. Soqutiginarsinnaavortaaq tamanna Mette Frederiksenip ilumuussusaanut siullertut misiliutitut atussallugu.

Qineqqusaarnerup nalaani Kim Kielsen Mette Frederiksenilu ataatsimut kronikkiliorput ima qulequtalimmik: De grønlandske ambitioner skal fremmes. Tassani takuneqarsinnaavoq Socialdemokratiip Kalaallit Nunaat nammineq tunngaviusumik inatsisitaassappat, naak naalagaaffeqatigiinnermi inatsit tunngaviusoq qullersaagaluartoq, ajornartorsiutitut isiginngikkaat. Aammattaaq socialdemokratimi siulittaasup Kalaallit Nunaannut meeraanerminni misiliutaasimasunut pisortatigut utoqqatsernissaminut piareersimasoq, soorlu aamma ilisimatusaatigalugu suliamut aningaasaliiffigerusukkai, suliami tassani Danmarkimiit nunatsinniillu oqaluttuarisaanermik ilisimatusartut kalaallinut tunngasut toqqorsivimmeersut atorsinnaalissavaat, nunat taakku marluk akornanni kanngunartuliat saqqummiunneqarnerussagamik.

Oqaluinnarneq iliuuseqarnerlu assigiinngillat. Socialdemokratiikkormiut siuliatigut suleqatigiuminarnikuunngillat.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER