Netflix passwordinik avitseqatigiittarnermut akiuinialersoq

Streamerinermik kiffartuussivik Netflix teknologiimik misileraaleruttorpoq, inuit ingerlatseqatigiiffiup kiffartuussissutaanut passwordinik avitseqatigiittannginnissaannik qulakkeerinniffiusussamik.

Teknologiimit nutaamit isiginnaartut najugaqatigiinnerat uppernarsarneqarsinnaassaaq, Netfliximit oqaaseqartitaq BBC-mut oqarpoq.

Atuisut arlallit oqaluttuarsimapput, isiginnaarutiminni nalunaarummik tigusaqartarsimallutik.

- Kontomik piginnittoq najugaqatiginngikkukku, taava isiginnaaginnarsinnaajumallutit illit nammineq kontoqartariaqarpugit, nalunaarummi allassimasoqarpoq.

Kisianni Netlfixip attaveqaataani tamani nalunaarutit taama ittut atorneqassanersut suli inaarutaasumik aalajangiunneqanngilaq.

Nunarsuarmi annerpaaq

Netflix nunarsuarmi streamerinermik kiffartuussiviit suli annersaraat, Danmarkimilu nuannarineqarpaajulluni.

Netfliximit oqaaseqartitaq Reutersimut oqarpoq, misileraaneq ”ilusilersorneqarsimasoq inuit Netfliximi kontomik atuisut tamatumunnga akuerisaanerannik qulakkeerinnittussatut ".

Netflixip piumasaqaataani allassimasoqareerpoq, kontomik pigisaqaleraanni, atuisut najugaqatigiissasut.

Tamanna kiffartuussivinnut nuannarineqarluartunut allanut aamma atuuppoq: HBO, Amazon Prime aamma Disney+.

Kisianni tamatuma aqukkuminaassinnaanera Netfliximik pilersitsisut ilaata, Greg Petersip, 2016-imili oqaatigisimavaa.

Atuisut 200 millionit

- Passwordinik avitseqatigiittarnerup inooqataaffiginissaa ilikkarneqartariaqarpoq, passwordinik unioqqutitsinani avitseqatigiittarneq annertuumik ingerlanneqarmat. Soorlu apparisannut meeqqannullu avitseqatiginninnerit, taamaattumik naleqquttumik najoqqutassaqanngilaq, aamma taamaannera ajoriffissaqartinngilarput, taamani oqarpoq.

Netflix 2020-mi 37 millioninik nutaanik atuisartoqalersimavoq. Kiffartuussivik ullumikkut nunarsuaq tamakkerlugu 200 millionit sinnilinnik atuisartoqarpoq.