Nersussuaateqarneq imminut napatissinnaasariaqartoq
Nersussuaateqarneq imminut akilersinnaassappat inuussutissarsiornikkut sinaakkutassat pitsaanerusariaqartut, nersussuullu neqaata tuniniarneranut siammarterineq pitsaanerusariaqartoq, Kalaallit Nunaani nersussuaateqarnermik ingerlataqartut annersaat isumaqarpoq
Kalaallit Nunaanni nersussuaateqarnermik inuussutsissarsiuteqartut annersaannik ingerlataqartoq, Sofus Frederiksen, Narsap eqqaani Kuup Iluani 2004-imi pingasunik nersussuaateqarluni aallartippoq.
Nersussuaateqarfik aatsitassarsiorfissatut tusarniutigineqartup Kuannersuit eqqaani inissisimavoq, aviisi Sermitsiaq allappoq.
Siorna nersutinik toqoraaneq sioqqullugu nersussuit 300-t missaanni uumasuutigai, taakkunanngalu 58-it toqoraavimmi Neqi A/S-imi toqunneqareerlutik Brugsen-imut tunineqarput. Sofus Frederiksenip siunissaq isumalluarnartuusoq isumaqarfigingaluarlugu, taamaattoq nersussuaateqarnermik inuussutissarsiorteqarnerup nunatsinni nutaajusut oqaatigineqarsinnaasup, suli maannakkumut assigiinngitsunik unammilligassaqarnera oqaatigaa.
Kujataani nersussuaateqarneq imminut akilerluarsinnaasutut ingerlalissappat, nersussuit ukiumut 140-t tungaannut tunineqartariaqassapput. Nersussuaateqarnerlu siunissami tapiissutinik isumalluuteqarani ingerlasinnaalernissaa anguniarneqartariaqartoq, taanna isumaqarpoq.
Tapiissutit qimanneqartariaqartut
Nersussuaateqarnermik inuussutissarssiuteqarneq maannakkuugallartumut suli Namminersorlutik Oqartussaniik nunalerinermut tapiissutinik pisariaqartitsisoq, tamannali siunissami aggersumi qimanneqartariaqartoq, Sofus Frederiksen oqarpoq.
- Siunissami aningaasatigut imminut napatissinnaalernissarput qulakkeerniarlugu tapiissutinik tunniussisoqartarpoq. Qanganitsertumik eqqarsartaaseq, tassalu tapiissutinik pissarsiuarnissamik eqqarsartaaseqarneq, qimakkiartuaarneqartariaqarpoq, taanna oqarpoq.
Taassuma nersussuaatimi amerliartortuarnissai anguniarpaa. Tamannali anguneqassappat piffissaq sivisooq atorneqartariaqarpoq. Nersussuarmilli ataatsimik Kalaallit Nunaata avataaniik tikisitsineq 30.000 kronit angullugit akeqarsinnaavoq, taamaattumillu nammineerluni kinguaassiortitsinissaq taassuma ornigiartinneruaa. Maannakuugallartumulli nersussuaateqarnermik inuussutissarsiuteqarneq savaatillit amerlanerit akornanni annerusumik annertusaaffgineqanngilaq.
- Kujataani nersussuit imak ikitsigipput, allaat savaatilinniit nersussuarnik pisiniaannarsinnaanata. Taamaattumik savaatillit amerlanerusut amerlanerusunik nersussuuateqalernissaat kissaatiginarsinnaavoq, taamaalillu ataatsimoorullugu nersussuaateqarneq neqinillu imminut pilersorneq annertusarsinnaaniassagatsigu, taanna oqarpoq.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: