Nersornaatisisoq inuusuttunik ikiuilluartartoq

Maniitsumi nersornaatisisariaqartutut inassuteqaatit tunngavigalugit decembarip tallimaani nersornaasiisoqarpoqr.

Karl Erik Karlsenip nersornaaserneqarnissaanut tunngavilersuutigineqarpoq:

- Sanasutut namminersorluni ingerlatani aanaartuulaarnini peqqutigalugu asoorutissallugu aalajangertariaqarnikuusimavoq. Taamaakkaluartoq inuk uninngaannartuunnginnami aammalu Maniitsumi suliffissuup matunerata kingorna inuusuttut suffissaaleqisut isiginnaaginnarusunnagit, Kommunalbestyrelsemut allagaqarluni saaffiginnissuteqarpoq siunnersuuteqarluni, Pilersitsiviup aallartinneqarnissaanut aallarnisaataasumik oqaatigineqarsinnaasumik.

- Inuusuttunik sullissinissaq assorujussuaq soqutigisaralugu uummateqarfigivaa, inuusuttullu sulisartoqarnerup iluani takutitsilluarnissaannik ineriartorluarnissaannillu ilitsersuuttarlugillu imminut pilersortunngorsinnaanissaannik aqqutissiuussilluni pingaartitsisuuvoq, kommunip tusagassiorfinnut nalunaarutaani allassimavoq.

Qasusuilluni suliniuteqartartoq

- Pilersitsiviup pilersereernerata kingorna, Pilersitsivimmilu sullissinerit ingerlanneqarnerani ulloq manna tikillugu ilaqutariit arlallit meeraat arlaqartut nikisittarpaat, atualernermut, ilinnialernermut, suliffeqalernermut, højskolernermut allanullu, inuunerannik allannguilluni pitsaanerusumut. Qassimmita inuusuttuaqqat suliffeqalerlutik, ilinniagaqalerlutillu angusaqartarpat, Karl Erik Karlsen peqqutigalugu, nersornaaserneqartoq pillugu nalunaarut taamatut allassimavoq.

Borgmesteri Malik Berthelsen nersornaasiinermi imatut oqaaseqarpoq:

- Ukiuni aggersuni sulisinnaassusilittut ukiullit ikiliartortussaapput, nunarpullu unittuussanngippat pingaaruteqarpoq inuusuttut sulisinnaasut tamaaviisa sulisinnaanngorsarneqarnissaat. Tamatumalu angunissaanut Karl Erik-tut ittut inuusuttunik imminut upprinnerlersitsillutillu ikiuisinnaasut amerlanerusut kommunitsinni atorfisaqartippagut.