Nersornaat
Nersornaat kuultiusoq Daniel Skiftemut
Politikeriusimasoq Inatsisartut siulittaasoqarfianit akimasumik nersornaaserneqarpoq
Ulloq sapaat Daniel Skiftemut immikkuullarippoq, tassami kuultiusumik Nersornaammik tunineqarami.
Vejlemi nalliuttorsiorpalaartumik katerisimaarnermi Inatsisartut siulittaasuata Lars-Emil Johansenip Daniel Skifte kuultiusumik Nersornaaserpaa.
Inatsisartut siulittaasoqarfiata Daniel Skifte inuiaqatigiinni politikikkut ukiorpassuarni piumassuseqarluni sullissisimanera tunngavigalugu kuultiusumik Nersornaaserpaa.
Daniel Skiftemut oqalugiaammini Lars-Emil Johansen ilaatigut ima erseqqissaateqarpoq:
- Siullermik Inatsisartunut ilaasortanngornerit kingusinnerusukkullu Naalakkersuisunngornerit aammalu Inatsisartunut Siulittaasunngornerit aqqutigalugit 1982-imili politikimut piumassuseqarluarlutit akuusimanerit pillugu Siulittaasoqarfiup kuultiusumik nersornaaserpaatit. Taakku Kalaallit Nunaanni politikikkut atuuffiit qaffasinnersaraat, taamaalillutillu Kalaallit Nunaat ullumikkut ilisimasarput ineriartortitseqataaffigisimavat.