Nersornaasiinermi akissarsiaritinneqartut isumaginninnermi pisartakkanut ilanngaataasarput

Isumaginnittoqarfimmit tigusartagaqarnerup nalaani kultoorikkut timersornerulluunniit iluani aningaasartaqartumik nersornaaserneqaraanni, nuannaarutaasinnaasoq killeqaratarsinnaavoq. Aningaasannattaammi ilaat isumaginnittoqarfimmit tigusartakkanut ilanngaataasarput. Justus Hansenip (D) § 37 atorlugu apeqquteqaataanut taama akissuteqartoqarpoq.

Nersornaasiinermi aningaasat pissarsiarineqartut akileraarutaasussaapput, naalakkersuisoq Vittus Qujaukitsoq (NQ) akissummini nassuiaavoq.

- Isertitat akileraarutaasussat pineqarmata tamatuma kingunerisussaavaa isertitat ilanngunneqartussaammata massakkut isertitani ingerlaavartuni (MII), taamaattumillu tunngaviatigut aamma isumaginninnikkut tunniunneqartartunik tigusisumut ataasiakkaamut sunniuteqartussaavoq, taanna allappoq.

Ataasiakkaanili iluatsitsisoqarsinnaavoq.

- Piumasaqaagtit erseqqinnerusut taakku naammassineqarsimappata, ataasiartamik isertitat ilai eqqarsaatigisariaqanngillat, isumaginninnermut oqartussaasut isumaginninnikkut ikiorsiissutit tunniunneqarneranut tunngaviusoq nalilerpassuk.

Justus Hansenip (D) ilanngullugu paasiumavaa ilanngaassisarneq atorunnaassappat tamanna pisortanut qanoq akeqassanersoq. Paasissutissalli taakku Akileraartarnermut Aqutsisoqarfimmi pigineqanngillat.