Nerrivimmi arsaarartartut nunanut allanut unammisartut sungiusaasuata soraarnissaa kaammattuutigineqarpoq
Kalaallit Nunaanni Nerrivimmi Arsaarartartut kattuffiani inuusuttuaqqat nunanut allanut unammisartut sungiusaasuata iliuuserisimasaa isoralugu Nuummi nerrivimmi arsaarartartut peqatigiiffiata TTC12-ip sungiusaasup tunuarnissaa kaammattuutigaa
Nerrivimmi arsaarartartut peqatigiiffiup TTC12-ip apriilip 29-ani allakkatigut naammagittaalliutigaa meeqqani inuusuttuaqqanilu 18-iliineqanngitsunut landstræner-inngorsimasup Gerhardt Isaksenip toqqaannaq attaveqaqattaarsimanera landshold-inngortussanut aamma landshold-inngornissamut ilaasortat angajoqqaavi, træner-ii imaluunniit klub-it aqutsisui oqaloqatiginerini peqataatinnagit.
Landshold-inngortitsinissaminik tunngavilersuutigisimanerarlugu ukioq manna GM-imi angusat aallaaviussasut.
Tamanna periuserisimasaa inatsisinik unioqqutitsinerusoq TTC12 isumaqarpoq. Peqatigiiffik TTC12 nerrivimmi arsaarartartut kattuffiannut naammagittaalliutigisaminnut arlaleriarlutik paasiniaasaraluarput kinguneqanngitsumilli.
- Naammagittaalliutiginnissut inatsisit ataanni aammalu GIF-ip maleruaqqusai malillugit illersorneqarsinnaanngilaq, meeqqanik innarliinnginnissaq malugalugu tamanna periuseq meeqqanut eqqarsartaatsikkut innarliisoqarsinnaanera allatulluunniit oqalussinnaanera meeqqanut innarliinnginnissamut illersuinerunngimmat, TTC12-mi siulittaasoq Reginald Jensen oqarpoq.
Sungiusaasuujunnaarnissaanik kaammattuut
Ilisimatitsissutigaa tamanna ilaatigut GIF-ip oqariartuutip eqqortuuneranik uppernarsarsimagaa aammalu kaammattuisaraluarlutik nerrivimmi arsaarartartut kattuffiat TTC12-imut suliap sumut killinnieranik kattuffiup ilisimatitsisarsinnaagalluartoq qaqugukkullu akineqarnissamik nalunaarsinnaagaluartoq. Taakku pisimanngitsut TTC12-mi siulittaasoq ilisimatitsivoq.
Taamaattumik nunanut allanut unammisartunut sungiusaasup Gerhardt Isaksenip nunanut allanut sungiusaasutut atuukkunnaarnissaa peqatigiiffimmit kaammattuutigineqarpoq.
Maanna TTC12 nerrivimmi arsaarartartunut kattuffiannut siulittaasumut kattuffiullu allattaanut tatiginnikkunnaarpoq - taakkua landstræner-inik namminneerlutik toqqaaginnarsimanerat siulersuisoqatitik isumasioqqaarnagit.
Meeqqat inuusuttuaqqallu 18-iliineqanngitsunut aammalu inersimasunut landstræner-ip piukkunneqarsimanerannut tunngavilersorneqarsimanngimmata piviusorsiortunik.
Siulersuisut piffissaqanngitsut tunuarlik
- Tatiginnikkunnaarneput aamma aallaveqarpoq GTTF-imi (nerrivimmi arsaarartartut kattuffiat) siulersuisut siulittaasup allatsillu ilaatigut sullitatik sinerissami klub-it unammisartullu siuariartortut ilaatigut tunulliullugit imminnut sullittarnerat aamma mumitinneqartariaqarpoq, nunatsinnilu klub-it unammisartuutitta piginnaasaasa suli siuarsarnissaat siunertaralugu, Reginald Jensen oqarpoq.
Assersuutigalugu oqarpoq 2018-imi siulersuisunut aningaasartuutit ukiumoortumik 50.000 koruunit saniatigut 146.000 koruunit siulersuisunut atorneqarsimasut ataatsimeersuarnermi paasisimanerarlugu.
- Aningaasarparpassuit taakkua sullitatsinnut unammisartunut siuarsaanermut atorneqarsimassagaluartut kissaatiginarnerusimassagaluarpoq. Taakkununnga sanilliullugit
ukiormanna GTTF-ip siulersuisuinit ilisimatinneqarpugut klub-ini siuarsaanernut GM-inullu tapiissutit ukiumut 15.000 kr.-iinnarnut killilerneqartut, TTC12-imi siulittaasoq ilassuteqarpoq.
- Sullitassaminnut periarfissaqanngikkunik kaammattorusunnarsinnaapput tunuaqqullugit tamanna ajunnginnerusinnaagaluarmat. Taamaassappallu ataatsimeersuarnissap tungaanut klub-it aqutsisui siulittaasullu tullia (Henrik Ottosen aaqq.) siulittaasuugallarnissamik ikioqatigiittoqarsinnaagaluartoq tapersersinnaavarput, Reginald Jensen oqarpoq.
Tusagassiutitiguunngitsoq
Naammagittaalliuutit pillugit nerrivimmi arsaarartartut kattuffiannut Hugo Svensson-imut saaffiginnissuteqarpoq. TTC12 naammagittaalliummik nassiussisimasoq uppernarsarpaa.
- Siulersuisut ataatsimoortinniarnerat upernariattorneranut aasaaneranilu massakkumut ajornakusoorsimavoq. Ilaatingut ulapinnerit piareersarnerit (Island Games-mut) sunngiffeqarnerit pissutaallutik.
- TTC-12 lip safinginnissuutaanut paasinarpoq utaqqikatakkunik aqissutissamut.. tamannaalu ajusaarutingaara. Nammiineq toqqaannaq saffigissavakka misissuinikka naammasseriarukki, ugguunaanngitsoq (tusagassiutitiguunngitsoq), Hugo Svensson oqarpoq.