Nerrivimmi arsaarartartut kattuffiata kinguaassiuutitigut innimiilliorsimaneq pillugu suliaq kinguarsaraa
Arnap inuusuttup angummit kattuffimmut attuumassuteqartumit kannguttaatsuliorfigineqarsimanermik naammagittaalliuutini, Kalaallit Nunaanni Assammik arsaarartartut Kattuffiannit GTTF-imit GIF-imillu qisuariarfigineqarnissaa qaammatini arfinilinni utaqqilunnarsimavaa. Arlaleriarluni akissutisinissani qinnutigisarsimavaa.
Arnaq 20-kkunik ukiulik Sermitsiaq.AG-mut oqaluttuarpoq, siorna juulip qaammataani Island Gamesimut peqataanermini angutip Kalaallit Nunaanni nerrivimmi arsaararttartut Kattuffiannut attuumassutillip kinguaassiuutitigut kannguttaatsuliorfigisimagaani.
Oqaluttuaraa arnat allat pillugit kinguaassiuutinut tunngallunnartunik oqaluuttarsimagaani, kissaatigineqanngitsumik eqitaarinnikkusuttarsimasoq 'niuminillu nului attualaartarsimagai'.
- Island Gamesimi pisup tarnikkut timikkullu sunnersimaqaanga, arnaq taanna oqarpoq.
Arnaq oqaluttuarpoq, Island Gamesertoqarnerani tamatumalu kingorna taamaalioqqunagu oqarfigisarsimallugu kiisalu Kalaallit Nunaanni Timersoqatigiit Kattuffiannit Island Gamesimut peqataatitaq tamanna pillugu oqaloqatigisimallugu.
Qisuariartoqarsimanngitsoq
Tamatuma kingorna GIF-imit tusagaqarsimanngilaq, taamaammat siorna septemberp 15-iani kannguttaatsuliorfigineqarnerit pillugit GIF-imi GTTF-imilu siulittaasunut pisortatigoortumik allagaqarsimavoq.
- Pisortatigoortumik tusagaqannginnama – imaluunniit Islandgamesimi il.il. pisimasut pillugit – apeqquteqarfigineqannginnama, pisimasoq uannut nuanniittupilussuaq pisortatigoortumik oqaluttuariniarlugu ilissinnut saaffiginnippunga, allakkani aallartnerlugit allappoq, taamaaleriarluni pisimasoq itisilerlugu allaaserivaa.
Sermitsiaq.AG-mit allakkat qanoq imaqarnersut ilisimaneqarpoq.
Qisuariartoqarsimanngilarli, taamaammat arnap inuusutup taassuma siorna decemberip aappaani ukioq mannalu februaarip 13-iani GIF saaffigaa nukingsaarlugu. Siullermik nalunaarfigineqarsimavoq, naammagittaalliuut GIF-imi siuttumut ingerlateqqinneqarsimasoq, tullianillu nukingisaarimmat tamanna GIF-imi siuttumut GTTF-imiliu siulittaasumut ingerlatitseqittoqarsimasoq ilisimatinneqarluni. Tamatumali kingorna susoqarsimanngilaq.
GIF: Nerrivimmi arsaartartut kattuffiat nukingisaarsimavarput
Sermitsiaq.AG-p isornartorsiut GIF-imut GTTF-imullu ataasinngormat saqqummiussimavaa.
- Gilbraltarimi siorna 2019-imi Island Gamesertoqarnerani kinguaassiuutigiut kannguttaatsuliorsimasinnaaneq pillugu Kalaallit Nunanni Timersoqatigiit Kattuffiata ilisimatinneqarnera tunngavigalugu, Kalaallit Nunaanni Timersoqatigiit Kattuffiata pisimasoq ingerlaannartumik misissorlugu aallartippaa, tassani aamma ingerlaannartumik Kalaallit Nunaanni nerriveeqqami arsartartut Kattuffianni (GTTF) siulittaasoq siulersuisullu oqaatsitigut allakkatigullu ilisimatinneqarput, GIF-imi siuttoq Jonas Jensen saaffiginnissutitsinnut akissuteqarluni allappoq.
- Tassunga atatillugu GTTF-imi siulersuisut qinnuigineqarput, pisimasoq sapinngisamik pitsaanerpaamik erseqqissaaffiginiarlugu misissueqqullugit kiisalu siulersuisut nalilerpassuk imaluunniit pisariaqarsorippassuk pisimasoq kinguneqartinneqartariaqartoq taamalu aamma pillaasoqartariaqartoq GTTF-imit eqqarsaatigeqquneqarpoq.
- Tassunga atatillugu Kalaallit Nunaanni Timersoqatigiit Kattuffiat mailikkut oqarasuaatikkullu akissuteqarnissaannik nukingisaarilluni GTTF-imut arlaleriarluni saaffiginnittarsimavoq, ajoraluartumik saaffiginnissutivut maannamut suli akineqanngillat.
- Aamma pineqartoq suliniutivut nukingisaarisarnivullu pillugit ilisimatinniarlugu attavigiuarparput. Kalaallit Nunaanni Timersoqatigiit Kattuffiata GTTF 2020-mi januaarip 17-iani attaveqarfigaa, februaarillu 25-ani nukingisaarummik nasseqqillugu.
GIF-imit maili
Sermitsiaq.AG saaffiginnimmat, GIF aammaarluni GTTF-imut attaveqaqqissimavoq, GTTF GIF-imut kiisami neriorsuisimavoq suliaq misissorniarlugu.
- GTTF-ip ullumi ilisimatitsissutigaa, GTTF-ip siulersuisuisa suliakkiissutigineqartoq suliarisimagaat, GTTF-imilu ileqqorissaarnissamut ataatsimiititaliamut suliaq ingerlateqqissimallugu.
Sermitsiaq.AG-p saaffiginninnerata kingorna GIF arnamut inuusuttumut tassunga allagaqarsimavoq.
- GTTF-imi siulersuisut siulittaasuat ullumi oqarasuaatikkut oqaloqatigaara, taassuma oqaluttuaraa suliakkiissutigalu suliaralugu aallartinneqarsimasoq, aamma siulersuisut ataatsimiissutigisimagaat. Suliamut atatillugu qaqugu akissutisissanersutit pillugu GTTF-ip piffissami qaninnermi attavigissavaatit, GIF arnamut taamatut allassimavoq.
Sermitsiaq.AG arnarluunniit taanna ulloq manna tikillugu GTTF-imi siulittaasumit Hugo Svenssonimit qisuariarfigineqarsimanngillat.
Arnaq naammagittaalliuumminik nassiussimalli maanna qaammatit arfinillit ingerlareerput, Island Gamesertoqarneranit aamma qaammatit arfineq-pingasut ingerlareerput.
Arnap nammineerluni oqaatigaa, suliaq kinguarsarneqartuartillugu ingerlariaqqinnissani ajornakusoortillugu.
- Eqqarsaatiginaveersaarsimagaluarpara, akissuteqarnerli ajormata akissutisissanerlunga ullut tamaasa eqqarsaatigisarpara.
Arnap taassuma inuusuttup aqqa aaqqissuisoqarfimmit ilisimaneqarpoq.