Neriuut: - Atornerluinermik qaangiisinnaanermut assersuutissatsialaavunga

Kerte Jeremiassen eqqarsariaqqaarani ingerlaannaq akivoq.

- Ukiuni tallimani, qaammatini qulini aamma ulluni 17-ini aalakuunngilanga, taanna oqarpoq.

Toqusimasinnaagaluartoq
Taanna maanna Kofoed Skolemi kalaallit immikkoortoqarfianni Københavnimi, Naapiffimmi suliffissarsiorluni qinnuteqaasiorluni issiavoq. Ukiut arfinillit matuma siorna tamanna pisussaannartut issimanngilaq.

- Atornerluinera taamaatissimanngitsuugukku ullumikkut toqoreersimanissara qularnanngilaq, taanna oqaluttuarpoq.

Maanna atornerluisunik katsorsaasutut ilinniarnini DAC-mi Frederiksbergimi naammasseqqammerpaa.

Kerte Jeremiassenip inuunermini aalajangiisumik mumititsisoq eqqaamalluinnarpaa. Apriilip 15-anni 2012-imi pivoq. Taamani imigassamik ikiaroornartumillu annertuumik atornerluisuuvoq, cigarettillu 40-t pujortartarlugit.

- Ulloq taanna Christianiamiippunga, ajorluinnarlungalu. Aammik meriarpunga, naakkullu anniartorujussuullunga.

- Nillerpunga ‘Guutiga ikiunnga’, taamaalillunga imeqqinnginniassagama.

- Arnat marluk ornippaannga, ikiugassaanersungalu aperalutik.

Paasinarsivoq pinsisiortuusut, taakkulu atornerluisunut katsorsaavik Frederiksbergcenterimiittoq ornissinnaagaa, Kertemut kajumissaarutigaat.

Ilungersunartumik kingunerlutsitsineq
- Frederiksbergscenterimi qaqugu aallartikkusunnersunga aperaannga, akivunga: Ingerlaannaq.

Piffissaq ilungersunartoq kingunerlutsitsiffiusoq pivoq, eqqarsarneq aamma timikkut toqqissisimannginneq.

- Timera imigassartorusulluni ikiaroorusulluni nilliavoq.

Kisianni ilaatigut saunarnerup, nillertumik uffarnerup aamma sivisuumik sikkilernerup Kerte kingunerlutsitsisikkunnaamivaa. Imerajuttunik naapeqateqartarnermigut imigassamut qiimaatitsisunik misigissutsinik oqaluuserinnitsittalerpaa.

- Ingammik ulapikkaangama, anniarneq, imminut pisuutinneq, ilaquttanik suliffimmillu annaasaqarneq qaqilertarput. Tassanilu imigassamut ikiaroornartumullu qimaasarpunga.

Ilinniarniarluniaalajangertoq
Katsorsartinneqarnermi kingorna Kerte Jeremiassen Nuummut uterpoq, ilaatigullu Nukissiorfiit, KNR aamma Røde Korsip meeqqanut angerlarsimaffiutaanni sulivoq. Kommunip katsorsaasutut pikkorissartitsineranut peqataanermini, sulererusunnerluni paasivaa. Taamaammat DAC-mi ilinniarnissamut qinnuteqarpoq, taanna Frederiksbergcenterimut katsorsartiffigisimasaanut atavoq.

- Ilinniarnerma kinguneraa, imminut ilisarisimanerulerneq. Inuttut sanngiiffikka ilisimavakka, qaqugukkullu nakkarnissannut ulorianartorsiortarnerlunga.

Ilinniarnerup saniatigut allanik ikiuisalereerpoq. Ilaatigut kalaallit Herstedvesterimiittut imerajuttut naapittarnerannik aqutsisarluni.

Uanilu sapaatip-akunnerani qaammatit 18-t qaangiuttut katsorsaasutut ilinniarsimalerpoq. Taanna peqatigalugu allat sisamat Nunatsinneersut ilinniarsimasunngorput, naammassinerminnut atatillugu ‘Qaarsutut Ilillunga’ Per Berthelsenip atugaa atorpaat.

Neriunnermik pilersitsineq
Taanna maanna Danmarkimi Nunatsinnilu atorfinnut qinnuteqaqattaarpoq. Allat atornerluisuujunnaartinnissaat Kertemut pingaarnerpaavoq.

- Kingusinaanngisaannartoq oqariartuutigaara. Uanga tamatumunnga assersuutissatsialaavunga.

Københavnimi sikkilerluni inunnik Mozarts Pladsimi, Sundholmimi aamma Christianiami imigassamik imaluunniit hashimik atornerluisunik orniguttaqattaartarpoq.

- Inunnut taakkununnga neriunnermik annikitsumilluunniit pilersitsisinnaanera neriuutigaara. Atornerluinermik taamaatitsisoqarsinnaavoq.