Neriuffiit Kattuffiat: 3.252.133 koruunit katersorneqartut
Neriuffiit Kattuffiannut tv-kkut ingerlanneqartumik nuna tamakkerlugu katersuiniartoqarmat, 3 milliuunit koruunit sinnerlugit katersisoqarpoq. Siornamit amerlanerungaatsiarput.
Obs: allaaserisaq nutarterneqarpoq Tele-Postip pisortaata oqaaseqarnera ilanngullugu. Tele-Post katersuiniarnermi suleqataavoq.
Kalaallit Nunaat, nunamilu innuttaasut 57.000-it missaat Neriuffiit Kattuffiannut akunnerni sisamani tv-kkut toqqaannartumik katersuiniartoqarmat, 3.252.133 koruunit katersorpaat.
Aallakaatitsinerup naammassinissaanut minutsit 15-iinnanngortut tv-kkut saqqummiisut nalunaaruteqarput katersuiniarnermi aatsaat taama amerlatigisunik tunniussisoqarsimasoq. Nalunaaqutaq 22:40 3.170.707 koruunit katersorneqarsimapput, tamannalu isumaqarpoq siornarnit 1 milliuunit koruuninik tunisisoqarnerusimasoq.
Siorna kræftimik napparsimalersimasunut ilaqutaasunullu ikiorsiissutissanik nuna tamakkerlugu katersuiniarnermi 2.133.283 koruunit katersorneqarsimapput.
Aningaasat katersorneqartut kræftimik napparsimalersimasunut tapiissutitut atorneqassapput. Aningaasat ilarpassui ataatsikkut tunniullugit legatitut tunniunneqartarumaarput.
- 3 milliuuneriarlunga qujasinnaagaluarpunga. Innuttaasunit tunniussisunut tamanut qujanarujussuaq, attortinnaqaaq, tv-kkut saqqummiisoq Heidi Møller Isaksen, nuna tamakkerlugu katersuiniarnerup aallakaatinneqarnerata naammasilernerani oqarpoq.
- Tulluusimaarpunga taama tapiisoqartigimmat. Qujanaq. Qamuuna assut attortippunga, Naalakkersuisut siulittaasuat, Kim Kielsen Neriuffiit Kattuffiannut 5.000 koruuninik tapiinermini oqarpoq.
Legatit
Siorna kræftimik napparsimalersimasut 198 legatinnatsinneqarput. Ukioq mannalu ukioq suli naanngitsoq legatit 168-it tunniunneqareersimallutik. Aningaasat legatitut taallugit ataatsikkut tunniunneqartarput, inersimasunut 3.000 koruunit, meeqqanullu 1.500 koruuniullutik.
Kalaallit Nunaanni inuit 170-it missaat kræftimik napparsimalertarput.
Nunatsinni katersuiniartoqaqqaartalermalli Tele-Postip telefonikkut sianerfigineqarsinnaasoq call-centeriikkussuuttarsimavaa, nunatsinni innuttaasut tassunga sianerlutik katersuiniarnermut tapiissutissaminnik nalunaarutiginniffigisinnaasaat. Nunatsinni innuttaasut tv-llit tamarmik aamma internettikkut attavillit aaqqissuussineq malinnaaffigisinnaasimavaat, KNR-TV-ikkut piffissami pitsaanerpaami, ilinniarfiup Nuummiittup GUX-ip paarlersuanit toqqaannartumik aallakaatinneqartoq.
Nuna tamakkerlugu katersuineq nalliuttorsiornerinnaanngilaq, aammali siunertamut pitsaasumut aaqqissuussineruvoq killitsisimaarnartoq. Tele-Postip pisortaanerata Kristian Reiner Davidsenip aamma katersuiniarnermi angusarineqartut naammasigimaarluinnarpai, misigisanilu ima oqaatigalugit:
- Isumaqarpunga kræftimik eqqorneqarsimasut ilaqutaasullu ataqqillugillu mianeralugit inuppassuit siunertaqarluartumik eqqarsaatigilluakkamillu ataatsimooqatigiisinneqartut. Tele-Postimi isumaqarpugut kræftimut akiuiniarnermi tamatta akisussaaqataalluta ikiuuteqataasariaqartugut. Taamaattumik aamma aappaagu katersuiniaqqittoqalerpat call-centeri piareersimatissavarput, ukioq mannalu ikiuuttut tamaasa qutsavigaakka, Kristian Reiner Davidsen oqarpoq.