Skip to main content

Nerisasserituup sassaalliutini blogg-imik allaaseraa

Juaaka Lyberth Sermitsiaq.AG-mi blogg-erit nutaat ilagaat. Blogg-imik allaqqaarnermini qeeraq pujuugaq misillittagaqarfigilikkanik eqqartorpaa

Angerlarsimaffimmi angutitut akisussaasutut akuttunngitsumik nerisassiorneq isumagisassarisarpara. Ukiorpassuarni taamaasiorsimavunga nuannaralugulu. Akuttunngitsumik immaqa ullut qulikkaarlugit kissartunik nerisassiorneq ajorpunga kisianni iffiukkat qallersuutissallu nunatsinneersut toqqartarlugit – missit, nikkut ajornanngippallu qilalukkat tikaagulliulluunniit mattaanik ilallugit apeqqutaatillugu qerititsivimmiittuuteqarnersugut allatulluunniit pissarsiarisinnaatillugit. Issatsiaq aammaarlunga iffiukkat qallersuutillu sassaalliutigisussaavakka, taamaattoq panertunik mattammillu akunagit. Pigisagut ileqqaalaartariaqarpavut aasaanerani angalaarfik aallartilermat uangalu tamakkua asimi nerissallugit iluarinerusarpakka.

Suliffinnit soraarama ulapiinnaq Brugsenip aqqusaarlugu siornatigut delikatessimi takusimanngisannik takuvunga: Qeeraq kissartumik pujuugaq – nammineq sanaaq. Qeeraq nunatsinneersoq tarajugaq kissartumik pujuugaq. Uanga qeeqqat nutaajutillugit igaat piumanerusarpakka ilaanni karrymik miseqqerlugit aamma qaqorteqqasunit naatsiiat piumanerusarlugit.. taamaattumik qaleralinnit qullukkiat qeeqqanit qullukkianit piumanerusarlugit. Immaqa qangali sungiusimasarigakku kisianni qaleralimmit qullukkiat aamma nutarfasissuusariaqarput nerpii qaqorlutik nutarpasillutik, qanganisaanngitsut sungaartumik qalipaatillit taamaattut orsui katagalillutik qaassunnitsunngortarmata. Usi, qeeraruna kissartumik pujuugaq eqqartoriga.

 

Peqqaataanik tunisassiaq poortugaq pissanganarpasissoq qimaannarpara akia qaffasiginermik – aalisagaq 200 gramip missaanniittoq 40 aamma 50 koruunit akornanni. (Kiilumut 215,90 kr.). Ussernartorsioriartuinnaramali uterlunga poortugaq 45,30 koruuninilik.

Angerlarsimaffitsinni qanga unnukkorsiutissat pissanganannguarsi, aatsaammi perngaammik qeqqamik kissartumik pujuukkanik ussiisussaagama. Siullermik aalisagaq iffialersornagu usseqqaarpara. Aalisakkatut tarajortikkatut pujuukkatullu nalinginnartut mamaqarpoq. Tulliatut nerpik pujuukkap qeqqaneersoq iffiamut punnertaqanngitsumut ilillugu usserpara. Taanna marlunnut aveqqippara aappaalu oqummiullugu. Tarajorninnera pujorsunninneralu malunnarnerupput aalisagaq iffiarlu ataatsikkoortillugit tamuavakka tamatuma saniatigut qeeqqap tikka maluginiarlugu aalisakkap sinnera aggorneqanngitsoq isiginnaarpara. Sumilluunniit qeerarsunninngilaq. Tarajorneqaaq pujorsunneqalunilu. Mamaa kapisilimmut pujuukkamut assinguneruvoq, naak kapisillit pujuukkat mamarnerullutik, isikkuginnerullutillu mamarunarnerusartut. Nalinginnaasumik qeeqqat amiisa nerpiisalu akornat orsoqartarpoq. Orsoq taanna amilerlugu mamartorsuuvoq nutaajutillugu igaajugaanngami. Qeeratinnili pujuukkami  orsup qalipaataa qaamasumik taajuminaatsumik qorsorpalungajattumik qajuusattumik qalipaateqarpoq, illinnarpallaarani. Nerpitaata ilaa aamma katagalavoq soorlu tamakkerluni qalassimanngitsoq.


Poortukkamik misissuilluarnikkut takusinnaavara apriilip tallimaanni poortorneqarsimasoq, tassa qeeqqap pujuukkap pisiarineraniit qaammat sioqqutitsiarlugu. Imaassinnaavoq nassuiaatissaata ilaa tassaniittoq. Ajoraluartumik unnuk taanna qeeraq kissartumik pujuugaq tarajugaq allamit usserneqarumanngilaq. Taamaattumik ulluni marlussunni nillataartitsivimmiiteqqinneqarpoq, ima illinnaatigilerluni igiinnartariaqarluni. Immaqa taamaattut tunisassiassatut ineriartorteqqinnissaat pitsaassusaatalu qaffassarnissaa eqqarsaatersuutigineqarsinnaavoq, qeeqqat kissartumik pujuukkat isumassarsiatsialaagaluarput, qanga KNR-iikkallarama taasakkavut ”hav-mjav”.
 

Juaaka Lyberth    
Allaatiginnittoq nerisasseritooq

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER