Nerisassat annissassat tunillaassinertaqanngitsut piumaneqarlualersut
Nerisassat annissassat allassimaffiat nutaaq, tunniussinermi inunnik attuinnginnermik periuseqarneq innuttaasunillu tapersersorluarneqarneq. Nuummi sassaalliuteqartarfiit ulluni marlunni matoqqatinneqareersullu neriniartarfeqarnikkut pissutsit taamaapput
Neriniartarfiit sutorniartarfiillu cafét tamarmik pingasunngornermi orniguttartunut matuneqareersullu kaaviiaartitat attatiinnarsinnaajumallugit innuttaasullu qaarsilaartissinnaajumallugit nutaaliortoqartariaqalerpoq.
Tamanna ilaatigut kinguneqarsimavoq Hotel Hans Egedep nerisassat annissassat allassimaffiannik immmikkut ittumik suliaqarsimaneranik, neriniartarfiit Iggup aamma Charoen Pornip ullut tamaasa nerisassanik annissassanik nal. 12-22 akornanni tamakkiisumik ingerlatsilersimanerannik kiisalu aatsisartut suliffeqarfiata Takanna.gl-ip periutsinik piffissamut coronap atuuffigisaanut naleqqussaasimaneranik.
Tunniussinermi inunnik attuisoqartanngitsoq
Taamaaliorsimapput tunniussinermi inunnik attuisannginnermik periuseq Zero Contact Delivery aqqutigalugu, tamatumanilu igasut biilinillu ingerlatitsisut aaqqateqartarlutik kiinnamullu assiaquteqartarlutik, kiisalu pisiniap aatsisullu akornanni timikkut attuisoqartarnani.
- Nalinginnaasumik aatsisarnitta ingerlatiinnarnissaa pineqarpoq, tamatumanili aamma pisiniat inniminniigaangamik toqqissisimasutut misigisimasarnissaanik tunillaassuisoqannginnissaanillu qulakkeerinninnissatsinnnik, Takanna.gl-imik piginnittoq, Jens Andersen, Sermitsiaq.AG-mut oqarpoq.
Hotel Hans Egedemi Takanna.gl suleqatigalugu nutaarluinnarmik suleriaasiliortoqarsimavoq.
- Siunertamut tamatumunnga nerisassat allassimaffiat immikkut ittoq suliarineqarsimavoq, tamannalu avataaneersunik tunisassiornitsinnut isertoqarani isumagineqarluni. Taakkua taamaallaat annissassatut inniminnerneqarsinnaapput, akunnittarfimmik piginnittoq Helge Tang oqaluttuarpoq.
Nuuk Cafe, pingasunik neriniartarfiuteqartoq, taakkuali ilaannik ataatsimik matusigasllarsimasoq, nerisassanik annissassanik suliaqarnermini ingerlallualereersimasoq, piginnittoq Rikke Pedersen oqaluttuarpoq.
- Innuttaasut tapersersuinerat nuannerluinnarpoq. Taakkoqanngikkaluarpammi kaaviiaartitaqarnavianngikkaluarpugut, oqarpoq.
Nuuk Café maannamut sulisunik soraarsitsisimanngilaq, taarsiullugulu nammineq kajumissutsimik feeriartussanngortitsisimalluni annissassanik suliaqarnermut atatillugu allanut nutaanik suliassaqartitsilersimalluni.
Arlaqarnerusunik atorfinitsitsisut
Takanna.gl-imi paarlattuanik ingerlasoqarpoq. Jens Andersen oqaluttuarpoq, nutaanik arlalinnik sullitaqalersimallutik, ilaatigut Hotel Hans Egede aamma Katuaq, sulilu allanik takkuttussaqartoq. Tamatuma kinguneranik sulisunik arlaqarnerusunik atorfinitsitsisimapput, suleriaatsillu nioqqutissanik ulluinnarsiutinik allanillu aatsisarnermut annertusinissaa suli sulissutigineqarluni.
Annissassanik pisiniartut amerlisimaneri pissutaalluni Takanna.gl-imi sulisut amerlineqarput.
- Biilit ingerlatitsisullu marloriaatinngortereersimavavut. Neriniartarfiimmi kaaviiaartitaqartuarsinnaaqqullugit ikorfartorusuppavut, uagullu sapinngisamik amerlasuunik immaqa corona pissutigalugu soraarsitaasimasunik atorfinitsitserusulluta, Jens Andersen oqarpoq.
Tamatuma saniatigut innuttaasut angerlarsimaffimminni aneqqusaajunnaarallarsimasut nerisassanik allanillu matuminnut pajunneqarnissaminnik pisariaqartitsisut kiffartuussinnaanerat nuannaarutigaa.
Nuuk Cafémeersoq Rikke Pedersen innuttaasut niuertunut tapersersuerusussuseqarluarnerannik maluginiagaqarsimavoq.
- Inuiaqatigiiarannguugatta immitsinnut paarilluartut tapersersuilluartoqartoq maluginiarpara. Annissassanik suliaqarnerput ingerlallualereersimavoq, aamma innuttaasut uatsinnut tapersersuinerat pillugu nersualaarujussuarusuppakka, oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...