WWF Kangia Kids
Nerisassanik nittarsaassinermi meeqqerivimmiut nammineq illinartuliaat sassaalliutigineqassapput
WWF Kangia Kids suliniummut atatillugu perorsaasunngorniat Ilulissanilu meeqqerivinniittut nerisassanik nittarsaassinissamut piareersaassapput
PI/SPS-imi ilinniartut 90 ilinniakkanit assigiinngitsunit sisamaneersut Ilulissanilu meeqqerivinnit assigiinngitsunit sisamaneersut sapaatip akunnerata ingerlanerani nunap pissarititaanik nerisassanik nittarsaassinissaq piareersassavaat.
Ilulissani Perorsaanermik Ilinniarfik (PI/SPS) tusagassiuutinut nalunaarummi paasissutissiivoq.
Suliniut ukiut tamaasa pisartoq
Suliniut WWF KANGIA KIDS ukiut tamaasa pisartuuvoq, Verdensnaturfonden (WWF), Kangia pillugu allaffik Perorsaanermillu Ilinniarfiup (PI/SPS) suleqatigiinneratigut 2014-imi pilersinneqartoq. Suliniut GrønlandsBankenimit aamma tapersersorneqarpoq.
- Suliniummi anguniagaavoq paaqqinnittarfiit meerartaasa avatangiisinut ilisimasaqalernissaat. Suliniummi WWF Kangia Kids-imi meeqqeriviit meerartaasa nunamiittarnerat ukiut siuliini isiginiarneqarsimasoq, ukioq manna isiginiarneqartut allanngorput, suliniuteqartut allapput.
Nammineq nerisassiorneq
Nerisassanik nittarsaassinermi nunatta pissarititaanik meeqqat nammineq illinnartuliaat sassaalliutigineqassapput.
- Suliniutip WWF Kangia Kids-ip ilinniartut meeqqanik 3 – 6-nut ukiulinnik nunami/silami perorsaanermik nalissaqanngitsumik misilittagaqalersissavai. Ilinniarnermi atuagarsornerup sulinerullu atassuserneqarsinnaanerat ilinniartitaanerup pitsaassusianut qaffassaataasarpoq, ilinniartullu suliniutip kingornatigut misilittakkatik sulinermikkut ineriartortissinnaallugit, Perorsaanermik Ilinniarfik allappoq.
- Pissamaateqarfissuaq
- Kalaallit Nunaanni pinngortitaq nerineqarsinnaasunik pissamaateqarfissuuvoq. WWF Kangia Kids suliniutikkut PI/SPS ukioq manna ilinniartunut, perorsaasunut minnerunngitsumillu meeqqerivinnut Ilulissaniittunut nunatta pissarititaanik misileraanikkut
isumassarsiortitserusuppoq, Nuka Kleemann PI/SPS-mi rektori oqarpoq.
- Suliniut avatangiisit ilisimasaqarfigillualernissaannik oqariartuuteqarpoq, siunissami nunatta pissarititaanik nerisassatigut nuannaarutigisinnaasatsinnik. Pisiniarfinnut pisiniaraangatta nerisassat suminngaanneersuuneri eqqarsaatigineq ajorpagut, avatinnguatsinnili aamma nerineqarsinnaasunik peqartoq.
Tamanut tikilluaqqusineq
Kikkulluunniit, Ilulissaniittut, nerisassanik usseerusuttut tallimanngornermi 25. august nal. 10 – 11.30 Sermermiuni tikilluaqqusaapput.
Alakkaasunut siullernut ilisarnaatitalinnik agguaassisoqarumaarpoq.
Aamma atuaruk: Suliniut WWF Kangia Kids