Nerisaqarneq: Kviksølvip ernumassutaanera ilisimatuut taamaatippaat

Kalaallit innuttaasut nunarsuarmi aamikkut kviksølveqarnerpaat ilagaat, miluumasut imarmiut annertuumik kviksølveqartut nerineqartarnerat pissutaalluni.

Kviksølvi kalaallit aavanniiittoq inuit amerlanerusut uummalluuteqalersinnaanerannik kinguneqarnersoq, ilisimatuut misissorlugu aallartissimavaat. Kviksølvi savimernit toqunartoqarnerpaannut ilaavoq.

Aallaavik

- Innuttaasunik misissuineq 2005-2010' katillugit 3083-nik peqataasoqarsimasoq illoqarfinnut qulingiluanut nunaqarfinnullu aqqaneq-pingasunut agguataagaasimasoq aallaavigisimavarput. 'Kalaallit Nunaanni nuna tamakkerlugu napparsimasunik nalunaarsuiffik'-mi, 'Danmarkimi nuna tamakkerlugu napparsimasunik nalunaarsuiffik'-mi kiisalu ' Kalaallit Nunaanni toqussutaasartunik nalunaarsuiffik'-mi 'Innuttaasunik misissuineq 2005-2010'-mi peqataareernermik kingorna uummalluuteqalersimanersut takujumallugu peqataatinneqarsimasut misissuiffigisimavagut, ilisimatooq Trine Jul Larsen, Steno Diabetes Center Copenhagen & Ilisimatusarfimmeersoq taama allappoq.

- Naak innuttaasunik misissuinermi inuit aamikkut kviksølvimik akoqarnerat qaffasikkaluartoq, aammiittup kviksølv-ip uuttorneqartup qaffasissusiata aamma Kalaallit Nunaanni innuttaasut akornanni uummalluuteqalersinnaanerup ataqatigiinnerannik nassaanngilagut, taanna ilisimatitsivoq.

Ulorianaataanerpaasoq

Tamatuma akerlianik uummalluuteqalernissamut ukiut ulorianaataanerpaasut paasineqarpoq, aammalu arnat angutinut sanilliullutik ulorianartorsiunnginnerusut.

- Inernerusut pigisatta takussuserpaat qangaaniilli kalaallit nerisartagaannut atasumik uummalluuteqalersinnaaneq piunngitsoq, taamaattumillu aalisakkanik miluumasunillu imarmiunik nerisaqartoqaannarsinnaavoq, uummalluuteqaleratarsinnaanermik ernummateqarani. Paasisagut pigineqaleraluartut kalaallit akornanni aammi saviminernik oqimaatsunik uuttuisarneq malinnaavigiuassallugu pingaartuuvoq aamma savimernit oqimaatsut allat imaluunniit akuutissat mingutsitsisartut uummalluuteqalersinnaanermut qaffassaaqataasinnaanersut misissussallugu soqutiginaateqarsinnaavoq, Trine Jul Larsen ilisimatusarnermit inernerit tunngavigalugit eqikkaanermini taama allappoq.