Neqip siunissaa KNI-mi kanngunartuliortoqarsimaneranit ulorianartorsiortinneqartoq

KNI A/S-imi aningaasaqarneq pillugu kanngunartuliaq annertuvoq, PwC-llu itisiliilluni misissuisimanerata takutippaa, ingerlatseqatigiffiup aningaasaqarnermut immikkoortortaqarfiani naatsorsuutitigut peqquserluuteqartoqartarlunilu nukiit nioqqutissallu kiisalu KNI A/S Neqi A/S-ilu eqqarsaatigalugit akuerineqarsinnaanngitsunik nuussisoqartarsimasoq.

Suliffeqarfissuup iluani nuussisoqartarsimanera suliffeqarfissuup ataatsimut angusaanut naminnerluunniit aningaasaataanut imatut sunniuteqarsimanngilaq, 2020/21-mut ukiumoortumik naatsorsuutini tallimanngormat KNI-mi ataatsimeersuartoqarmat saqqummiunneqartuni atuarneqarsinnaavoq.

PwC-lli eqqartuussissuserisoqarfimmit Bech-Bruunimit inatsisitigut ikiorneqarluni qaammatini arfineq-marlunni misissuisimanera eqqarsaatigalugut paasisat ilungersunarluinnartuupput.

-Neqi A/S-imut tunngatillugu akuerineqarsimanngisumik nuunneqarsimasut utertinneqarnerisigut suliffeqarfiup ukiumi naatsorsiuffiusumi 2019/20-mi 6,8 millionr koruuninik sinneqartoorfiusutut nalunaarutigineqaraluartumut sanilliullugu 2020/21-p aallartinnerani nammineerluni aningaasatai 29,4 millioner koruuninik amigartoorfiupput, ukiumoortumik naatsorsuutini ilisimatitsissutigineqarpoq.

Ikiorserneqartariaqartoq

Ingerlatseqatigiiffik nammineq aningaasaatimigut sinneqartooqqarialuni annertuumik amigartooruteqalersimavoq. Toqoraavik aamma 2020/21-mut ukiumoortumik naatsorsuutini akileraarutit peereerlugit 17,1 millioner koruuninik amigartooruteqarsimavoq.

Neqi A/S-imip taamatut ilungersunartumik ingerlasimanera siulersuisut ukiumoortumik nalunaarusiaminni imatut oqaaseqarfigaat, ”ingerlatsiviup oqaluttuarisaanermini aningaasaqarnera imminut nammassinnaanngitsoq”. Tamannalu tunngavigalugu ingerlatseqatigiiffiup immikkoortortaqarfia Naalakkersuisunit Inatsisartunillu akuleruffigineqarluni ikiorserneqartariaqartoq.

- Neqi A/S-ip nammineq nammineerluni aningaasaatini pilerseqqissinnaagai piviusorsiortuunngilaq, taamaattumik suliffeqarfimmut atugassarititaasut iluamik paasineqarnissaasa tungaanut suliffeqarfiup pingaarnerup aningaasatigut ikiuunnissaa aalangiunneqarpoq, tamannalu pissaaq aningaasaliissuteqarnikkut imaluunniit kiffartuussinissamik isumaqatigiissutikkut akilerneqaatissat amerlanerisigut. Taamali iliortoqassappat Naalakkersuisut Inatsisartullu akuleruteqqaartariaqarput. Taamaattumik Neqi A/S-imiit pissarineqartut nalingat kiisalu suliffeqarfissuup pingaartumik Neqi A/S-imut tunngatillugu sanaartukkat nalillit pigisaanut nioqqutillu uninngasunut tunngasut assut nalorninartumik inissisimapput, ukiumoortumik nalunaarusiami innersuussutigineqartumi allassimavoq.

Neqi A/S Narsamiippoq, toqoraavimmilu savaaqqanik tunisaqartoqartarpoq, piareersaasoqartarpoq tuniniaaqqittoqartarlunilu. Taakku saniatigut naatsiiat nunatsinni naatitat tuniniaqqitassanngorlugit pisiarineqartarput. Kujataani inuussutissarsiuteqarnikkut unammillernartoqareersumi savaateqarneq naatsiianillu tunisassiortarneq suliffeqarfimmut pingaaruteqarluinnartuupput.