Neqip naatsiaanik naatitsisartut tamaasa naatsiianik pisiniarfigisarpai

Neqip pisortaa Per Jensen ersarilluinnartumik oqaasissaqarpoq.

- Ukiumi naatinneqarsimasut tamaasa pisiarisinnaavagut, taanna Sermitsiaq.AG-mut oqarpoq.

Ullumi Sermitsiaq aviisi saqqummertumi Eqaluit Iluanni najugalik Ferdinand Egede naatsiianik naatitsisartup Neqi naatsiianik naatitarisimasaanik piserusunnginnerarlugu isornartorsiorpaa. Taamatulli nalunaaruteqarnera Per Jensenip paasisinnaanngilaa.

- Nalulluinnarpara sooq taama isumaqalersimanersoq, Neqip pisortaa oqarpoq.

ATUARUK: Naatsiianik naatitsisartoq: Neqi A/S-ip namminersortut unammillerpai

Nalunaaruteqarsimannginnneq

Per Jensen nassuiaatigaa, upernaaq Neqip savaatillit peqatigiiffiat SPS allaffigisimagaa paaserusullugu qanoq amerlatigut naatsiianik tuniserusunnersut. Akissuteqarnissaallu sivitsornera pissutigalugu, naatsiaanik naatitsisartut toqqaannartumik isumaqatigiissusiorfigisimallugit, naak tamanna peqatigiiffik aqqutigalugu ingerlanneqartaraluartoq.

Oqaloqatigiinnerlu massakkut pitsaasumik ingerlanneqarpoq, ippassarlu ulloqeqqata missaani Neqi SPS-imiit naatsiianik naatitsisartut isumaqatigiissuteqarfigineqareersut saniatigut allat atii pissarsiarisimavaat.

- Tamaasa pisiniarfigisarpagut, Per Jenseni oqaqqippoq.

2018-imi naatinneqartussat tamaasa pisiariniaraat

Ilanngullugu neriuutigaa, ukiup tulliani siusissukkut qanoq amerlatigisut naatsiianik tuniserusunnersut Neqi nalunaarfigineqarumaartoq.

- Tamanna pilersaarusiornitsinnut naatsiianillu tunisassiornitsinnut pingaaruteqarluinnarpoq, Per Jensen oqarpoq.

Kisianni susoqarluarpalluunniit, ukiup tulliani naatinneqarsimasut tamaasa Neqip pisiarerusuppai.