Neqi: Naatsiianik igitsiinnartarneq avaqqunneqarsinnanngilaq

Neqip naatsiiat tonserpassuit ajoquteqarnerat pissutigalugu aammaarluni igiinnartariaqarsimavai. Tamanna avaqqunneqarsinnaanngilaq, pitsaanerulersinnaavorli, pisortaq isumaqarpoq.

Neqip naatsiianik tonsikkaanik igitsiinnartarnera nalinginnaasuuvoq, tamannalu allaanerusinnaanngilaq, Neqi A/S-imi pisortaq Per Nielsen oqarpoq

- Igitassaqartuaannarpoq, pisiniarfinni tunineqarnissamut ajorluinnartarmata. Inuussutissarsiummi tassani tassa taamaappoq, pisortaq oqarpoq.

Taannali isumaqarpoq pitsanngorsaanissamut inissaqartuaannartoq.

- Naatitsisartut tunisaqarnerpaasartut ilaasa naatsiiaatini ukiut tamaasa 100 procentingajammik pitsaalluinnartutut akueritittarpai, pisortaq oqarpoq.

Naatsiianik naatitsisartup allap Neqimut tunisisartup, siorna naatsiiat 10 tinsit missaanniittut igiinnarsimavai, taassuma nammineq aamma Savaatillit Peqatigiit Suleqatigiissut siulittaasuata isumaat naapertorlugit, naatsiiat qaqinneqaramik kusanarluinnarsimapput. Naatsiialli aaneqarnissaannut piffissaq sivisooq ingerlasimammat imaluunniit naatsiiat assartorneqarnerminni qerisimallutik ajortissimammata atorneqarsinnaasimanngillat.

Aallertoqarniartarnera ajornartorsiutaasoq

SPS-ip siulersuisuini siulittaasup Lars Nielsenip Neqimik suleqateqarneq naammaginngilluinnarpaa.

- Aallertoqarniartarnera uninngatitsisoqartarneralu piffissami sivisuumik ajornartorsiutigisimavarput. Ajornartorsiut tassaavoq, piffissami naatsiiat aaneqarfissaanni savaaqqanik toqoraasoqartarnera, tamatuma saniatigut naatsiianut naammattumik inissaqartitsisoqanngilaq, taamaammavt naatsiiat sivisuumik uninngatinneqarnerminni ajortittarput, taanna oqarpoq.

Per Nielsenip erseqqissaatigaa, tamanna ajornartorsiutaasariaqanngikkaluartoq, tassami SPS-ip Neqillu suleqatigiinnissamik isumaqatigiissutaanni piumasaqaataavoq, savaaqqanik toqoraanerup aallartinnginnerani naatsiianik aallertoqartassasoq.

- Inuussutissanut tunngatillugit malittarisassat pissutigalugit savaaqqat salliutittariaqaratsigit, naatsiianik aallertarnissamut ajornartorsiutaalersinnaasut pinngitsoortinniarlugit tamanna piumasaqaataavoq, taanna oqarpoq.

Ilippanaateqarnerulluartoq

Pisortap erseqqissaatigaa, naatsiianik pitsaalluinnartunik naatitsisartutut eqqaaneqartoq, naatitsisarnermini periuseqartoq naatitsisartunit allanit iluaqutigineqarsinnaasumik, tassa naatsiianik naatitsisartut pitsaanerusunik tunisassaqartalernissaannut.

Naatitsisartup pineqartup aamma savaaqqanik toqoraalersoqartinnagu naatsiianik tunisaqartarnissani eqqumaffigisartupilussuuaa, taamaammallu naatsiiat aaneqarnissaannut unammilligassaqartarani, taanna oqarpoq.

- Naatsiianik naatitsisartut imminnut ilinniarfigalutik naatsiiat pitsaassusaannik qaffaaqataasinnaasuuppata, maannamut sanilliullugu amerlanerujussuarnik naatitsisoqartarnissaanut ilippanaateqarluarsoraara.

Powered by Labrador CMS