Skip to main content

Neqi umimmannik toqoraaqqilerniartoq

Kangerlussuarmi umimmannik toqoraavik ammaqqinneqassaaq, atuisullu pisiniarfiit nillataartitsiviinni umimmaat neqaannik ukiuni pingasungajalluinnarni pissarsisinnaasimanatik ukiamut pissarseqqissinnaanngussapput.

Kangerlussuarmi ukiuunerani umimmanniarnerup nalaani januaarip 25-aniit februaarip 23-at ilanngullugu Neqi A/S umimmaap neqaanik tunitsivigineqaqqissinnaalissaaq.

Taamaalilluni ukiamut umimmaap neqaanik Nunatsinneersumik mamartorsuarmik Neqi A/S-imeersumik Nunatsinni niuertarfinni umimmaminersisoqaqqissinnaalissaaq.

- Neqimiit nuannaarutigaarput aasap kingorna umimmaap neqaanik Nunatsinni pisisartunut tunisassaateqaqqilernissarput. Tamanna Neqimut ilisarnaataalluinnarpoq, soorlumi Neqi A/S-ip ilisarnaataani umimmak ersittoq. Neriuutigivarpullu Kangerlussuarmi umimmaap neqaanik siunissamissaaq pisiortortarsinnaanissarput, Neqi A/S-imi pisortaq Ole Vestergaard oqarpoq.

Lilleholmip Kangerlussuarmi tunisassiornini 2017-imi matummaguli, nunami umimmannik toqoraavittut akuersissuteqartoqarsimanngilaq. Tamatuma kinguneranik Brugseni Pisiffillu umimmaat neqaannik tunisaqarsinnaasimanngillat, tunisassiassanimmi toqoraanermut atatillugu inuussutissat immikkut ittunik malittarisassaqartinneqarmata. 

Toqoraaviup ammaqqinneqarnera inuppassuarnut iluaqutaassasoq

Tunitsivimmik ammaaneq pisiortornerup nalaani suliffissanik aqqanilinnik pilersitsissaaq. Narsap toqoraaviani misilittallit arfinillit kiisalu Qeqqata Kommuniani Majoriaq suleqatigalugu sulisut tallimat sulilissagamik.

Tamatuma saniatigut Narsami toqoraavimmi aasaanerani umimmaap neqaat tunisassiarineqarnerini akunnerit 5.000-it suliffissaqartitsisussaassapput, Neqi ilisimatitsivoq.

Piniartut umimmattamik neqaanik tunitsivimmut nersutip nakorsaanit nakkutigineqartumut
tunisi-sinnaalissapput, umimmaat amiisa pisiortortunut tunisinnaanerisa saniatigut. Neqi A/S KNAPK-lu isumaqatigiissimapput umimmaap neqaa kiilumut 37,50 koruunilerlugu Neqimut tunineqartassasoq.

Piffissami sivisuumi tunitsiveqarsimannginneq

2016-imi januaarip qaammataani Lilleholm Foodip umimmannik toqoraasunngormalli Neqi A/S Kangerlussuarmi toqoraavimmut attuumassuteqarsimanngilaq.

Lilleholmimulli toqoraalluni inuussutissarsiuteqarneq sivikissimavoq. Umimmannik toqoraaneq amigartoorutaasumik ingerlasimavoq, suliffeqarfiullu ingerlatsinermi pisariaqartinneqartunik tapiiffigitittarnissaq pillugu Naalakkersuisut isumaqatigiissuteqarfigisinnaasimanngilai.

Tamatuma kingunerani suliffeqarfik 2017-imili tunisassiorunnaarpoq, tamatumalu kingorna ammaqqinneqarsimanani.

2019-imi decembarip 18-iani suliffeqarfiup umimmannik nunatsinneersunik tunisassiornissamik takorluisimanera kipitinneqarpoq, ullormi taanna Ingerlatseqatigiiffiup 22. marts 2018-imeersup ApS-ip - siusinnerusukkut Lilleholmitut ilisimaneqartup - akiliisinnaajunnaarnera Kalaallit Nunaanni Eqqartuussiviup aalajangiiffigivaa.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER