Neqeroorut nutaaq: Sakkutuutut ilinniagaqaritsi
Danmarkimi illersornissaqarfiup sakkutuutut ilinniagaqartalernissaq sulissutigileruttorpaa, tamanna kalaallinuinnaq neqeroorutaassaaq. Illersornissamut ministerip Trine Bramsenip aqangu sisamanngornermi Kalaallit Nunaannut tikittussap tamanna ilisimatitsissutigaa.
Illersornissamut ministerip Trine Bramsenip ukioq manna aallartiinnartorli naatsorsuutigisimavaa, kalaallit siullliit Kalaallit Nunaanni sakkutuututu immikkut ilinniagaqalersinnaanerat.
- Suliassanik amerlanerujartortunik pingaaruteqartunillu, Issittumi suliarineqartussanik suliassaqaleriartuinnarpugut. Tassunga atatillugu pingaaruteqarpoq, kalaallinik amerlanerusunik Illersornissaqarfimmi sulisoqarnissarput. Nunami kulturimik oqatsinillu paasinnissinnaasunik sulisoqarnissarput pingaaruteqarpoq, Trine Bramsen Sermitsiaq.AG-mut nassuiaavoq.
Ilinniagaqaqqinneq
Illersornissamut ministerip ilisimatitsissutigaa, inuit quliniit 15-inut amerlassusillit siunnerfilimmik ukiumut ilinniagaqartarnissaat naatsorsuutaasoq, inuit taamaalillutik ilinniagaqarsimanermik qaavatatigut sakkutuutut piginnaasaqarnissamik ilinniagaqaqqissinnaapput. Tassa soqutiginnittut Illersornissaqarfimmi sakkutuujusimasariaqanngillat.
- Ilinniagaqarneq ukiup affaaniit ukioq naallugu ingerlanneqarsinnaavoq, apeqqutaalluni ataasiakkaat qanoq piginnaasaqartiginissaat. Tassa ilinniartitaaneq assigiinngitsunik qaffasissuseqarlunilu sivisussuseqarpoq, Trine Bramsen ilisimatitsivoq.
Ilinniarfissap Kalaallit Nunaanni sumorpiaq inissinneqassanersoq suli aalajangiunneqanngilaq, suliniutip nutaarluinnaanera sulilu pilersaarusiorneqarnera suli naammassineqannginnerat pissutigalugu.
Neriuuteqarluartoq
Misiligummik suliniut pineqartoq Trine Bramsenimit neriuuteqarfigilluarneqarpoq.
-Soorunami neriuutigaarput, ilinniagassaq nutaaq kalaallinit soqutigineqarluarnissaa. Kalaallit Nunaanni Issittumilu isumannaallisaanermik politikkimi unammilligassanik suliaqarusussuseqartoqarnissaa, Trine Bransen oqarpoq.
Trine Bramsen illersornissamut ministeritut siullermeerluni aqangu sisamanngornermi Kalaallit Nunaannukassaaq. Decemberip qaammataani nunatsinnukarnissaraluani taamaatiinnartariaqarsimavaa, Forsvarets Ejendomsstyrelsemi kanngunartuliortoqarsimanerata annertuumik sulissutigineqarnera pissutigalugu.
Pisussatut pilersaarutit
Trine Bramsenip tikeraarnermini Attaveqaqatigiinnermut Naalakkersuisoq Karl Frederik Danielsen aamma Nunanut allanut Naalakkersuisoq Steen Lynge ataatsimeeqatigiissavai. Issittumi Sakkutooqarfimmut, Sakkutuujusimasut angerlarsimaffiannut pulaassaaq aamma angallat alapernaarsuut Knud Rasmussen ilaaffigalugu angalaassaaq. Tamakkua saniatigut InterForce Grønlandip Issitumi Sakkutooqarfiup illutaani allaffissaata ammaanersiorneqarneranut peqataassaaq.
Aamma InterForcep allaffeqarfissaanut tunngassuteqartoq atuaruk: Illersornissaqarfik allaffimmik nutaamik Nuummi ammaavoq