Neqeroortitsinermi ajutoorneq pillugu ammasumik siunersiueqatigiittoqalersoq

Qaqortumi timmisartoqarfiliornissamut neqeroortitsineq taamaatiinnarneqareersoq, politikkerit soqutigisaqaqatigiillu arlallit susoqarsimanersoq paaserusulersimavaat.

Tamanna immaqa sapaatip akunnerani aggersumi akissutissarsineqarsinnaassaaq, Aningaasaqarnermummi Akileraartarnermullu Ataatsimiititaliap Naalakkersuisut suliaq pillugu ammasumik siunersiueqatigineqarnissaannut aggersaasimavoq.

Tamanna ataatsimiititaliap sapaatip akunnerani matumani ataatsimiinnermi aalajangiuppaat, ataatsimiititaliami siulittaasoq Hermann Berthelsen (S) uppernarsaalluni oqarpoq:

- Siunersiueqatigiinneq sapaatip akunnerani aggersumi pissasoq naatsorsuutigineqarpoq, siulittaasoq Sermitsiaq.AG-mut oqarpoq.

Ammasumik siunersiueqatigiinneq pineqartillugu kikkulluunniit ataatsimiinnermut manilnnaasinnaapput.

IA siunersiueqatigiinnissamik naammagisimaarinnittoq

Ataatsimiititaliami ilaasortap Múte B. Egedep (IA) ammasumik siunersiueqatigiinnissaq siunnersuutigisimavaa:

- Kissaatigisatta allanit isumaqatigineqarnera naammagisimaarparput. Innuttaasut timmisartoqarfiliorniarnermut annertuumik aningaasaliissuteqarsimanerup paasisaqarfiginissaat inissaminiippoq. Taamaattussaavormi, taanna oqarpoq.

Attaveqaqatigiinnermut Naalakkersuisup Karl Frederik Danielsenip (S) ilisimatitsissutiginikuuaa, Kalaalit Airports Domesticip suliap ingerlaqqinnissaanut suliniuteqarnissaa Naalakkersuisunit utaqqineqartoq.

Siunersiueqatigiinnermi paasisaqarnerunissat ilimagaajuk?

- Apeqquterujussuaq, Inatsisartulli tassaapput tamatuma qanoq ingerlanneqarnisaanut inatsisiliorsimasut. Kalaallit Airports aalajangiisussaanngilaq, Mué B. Egede oqarpoq.

Inatsisartut kisimik suliniummut sinaakkutissanik allannguisinnaasut

- Paasissallugu soqutigaarput, sinaakkusiisarnermi inatsit avaqqunneqarnialernersoq, tamannami Inatsisartut kisimik allanngortissinnaavaat. Naalakkersuisuunngitsut imaluunniit Kalaallit Airportsiunngitsup. Inatsisartut suliap killiffianik paasisaqarnerunissaat inissaminiippoq, taanna oqarpoq.

Kalaallit Airportsip Qaqortumi timmisartoqarfiliornissamut neqeroortitsineq pillugu isumaqatiginninniarunnaarsimanera saqqummiunneqarmat Kujataani annertuumik ernumalertoqarsimavoq.

Nassuiaatigineqarsimavoq, neqeroorutit ingerlatseqatigiiffiup timmisartoqarfiliornissamut pissarsiarisimasaanit annertunerusimasut.