Neqeroorneq: Mittarfik 1 koruunilerlugu pisiarerusunneqartoq
Ullumi Qeqqata Kommuniani Kommunalbestyrelsip ataatsimiinnermini, kommunimi attaveqaqatigiinnermi atortulersuutit annertunerusutkatsersuutsilernissaat siunertaralugu, ingerlatseqatigiiffimmik pilersitsivoq. Kommunip Kangerlussuarmi mittarfik 1 koruunilerlugu pisiarerusuppaa.
Ingerlatseqatigiiffik A/S Arctic Circle Traffic-imik taaguuteqassaaq.
Sisimiuni kommunip talittarfiutaa aamma Sermersuup Kellyvillellu akornanni aqqusineq ingerlatseqatigiiffimmi aallaqqaammut, Qeqqata Kommuniata aningaasaliiffigigunigissai pilersaarutaasoq, tusagassiuutinut nalunaarummi paasissutissiarineqarpoq.
- Malitsigisaanik ingerlatseqatigiiffik ataatsimoorussami Kangerlussuarmi mittarfimmi Namminersorlutik Oqartussat aningaasaliisinnaapput. Naalakkersuisut ataatsimoorussamik ingerlatseqatigiiffimmut
piginneqataajumanngippata, Kangerlussuarmi mittarfik Qeqqata kommuniata 1 koruunimik akilerlugu pisiarinissaa neqeroorutigissaavaa, kommuni nalunaaruteqarpoq.
Sanaartornerit arlallit ingerlatseqatigiiffimmut ilanngunneqassasut
Qeqqata Kommuniani Namminersorlutik Oqartussat mittarfiutaasa aamma umiarsualiviit sinneri ingerlatseqatigiiffimmi naalakkiutitut aningasaliiffigineqarsinnaasut, imaluunniit A/S Arctic Circle Traffic-imit ataaseq 1 koruunilerlugu pisiarineqarsinnaanissaat, kommunimit takorloorneqartoq, allassimavoq
Aammattaaq eqqarsaataavortaaq, pilersaarutaareersut naapertorlugit, ingerlatseqatigiiffimmit Sisimiut Kangerlussuullu akornani aqqusinisaq pilersinneqassasoq.
- Aalajangiinikkut, kommunimut minnerunngitsumillu Kangerlussuarmi innuttaasunut iluaqutaasussamik, Kangerlussuup mittarfeqarfittut, takornariaqarfissuartut kiisalu sukisaarsarfittut
ineriartortinneqarnissaanut Qeqqata kommunia piareersimavoq. Immikkoortumi periarfissat upperaagut, aammalu mittarfik nunaqarfillu sorsuutigissallutigit. Kangerlussuup Mittarfiani
unammillernartut Namminersorlutik Oqartussanit ilisimasaqarfigineqanngippata, taamatullu mittarfik upperinngippassuk, sumiiffimmi piginnittoqarnissaq pingaaruteqarpoq, borgmester Malik Berthelsen tusagassiuutinut nalunaarut naapertorlugu oqarpoq.
Akissaa qanoq aalajangiunneqarsimanera ilisimaneqanngitsoq
Kommunalbestyrelsip Namminersorlutik Oqartussat pigisaannik qanoq ilillutik 1 koruunilerniarlugu aalajangersimanersut, tusagassiuutinut nalunaarummi allassimanngilaq.
Inatsisartut ataasinngorpat mittarfiit nutaat sinaakkutissaat pillugit siullermeerinninnissaat ullualunnguanik sioqqullugu kommunalbestyrelsip saqqummiussivoq.