NemPost atorneqarsinnaajunnaarpoq
Pisortani Digitalimik Allakkerineq innuttaasunit atorneqartalertussanngorpoq. Taamaammat allakkanik nassiussiffik NemPost nunatsinni atorneerutsinneqarpoq.
Innuttaasut 3.000-it missaat NemPostimik atuisuusut, kontuminnut isersinnaassanngillat.
Namminersorlutik Oqartussat tusagassiorfinnut taama nalunaaruteqarput.
- Ukioq manna 2020-mi pisortani oqartussanit allakkanik digitalimik nassitsittalernissaq innuttaasunut 15-ileereersimasunut tamanut pinngitsoorani atuutilissaaq. Innuttaasut NemPostimik digitalimik aamma oqartussanut attaveqaqatigiittarfittut aqqummik isumannaatsumik atuisimanerat taarserlugu Pisortani Digitalimik Allakkerineq atorneqalissaaq, Namminersorlutik Oqartussat tusagassiorfinnut nalunaaruteqarlutik allapput.
Suliaq nanginneqarpoq
Pisortani digitalimik allakkerineq aprilip aallaqqaataani ukioq manna atulersimasussaagaluarpoq. Coronavirusimilli tunillaassortoqarnera pissutigalugu suliaq kinguartinneqarallarsimalluni.
Suliarli maanna aallarteqqippoq.
- Pisortani Digitalimik Allakkerinerup eqqunneqarnissaanut innuttaasut piareersaleriissasut Digitalimik Sullissinermut Aqutsisoqarfiup innersuussutigaa. Tamatuma kingunerisaanik NemID-mik pissarsiniassapput e-Boks kontumillu pilersitsillutik, allassimavoq.