NCD-p kinguneri: Sermersooq amigartooruteqarujussuarpoq

Kommuneqarfik Sermersuumi aningaasaqarnermut ataatsimiititaliaq marlunngornermi ataatsimiissaaq, politikerillu tassani kommunip 2022-mut naatsorsuutaanik saqqummiiffigineqassapput. Politikerit ilungersunartunik saqqummiussiffigineqassapput, tassami 2022-mut kisitsisit 814 mio. kr.-nik annertuumik amigartooruteqarnermik takutitsipput. Ingerlatsiviup kisitsisit ima nassuiarpai:

- 2022-mi kisitsisit naapertorlugit takuneqarsinnaavoq katillugit 814 mio. koruuninik amigartooruteqartoq, nammineerlunilu aningaasaatit 1.116 mio. koruuniusut. 2022-p naanerani kommune 18,5 mio. kr.-nik karsimiittuuteqarpoq.

Illoqarfiup ineriartortinneqarnissaanut ingerlatseqatigiiffimmi Nuuk City Developmentimi ingerlanerluttumi suliniutit angerlaannerinut akiligassaavoq, kommunip taakku siorna naatsorsuutinut ilannguppai.

Eqqunngitsuliornerusimasut

Kommunip pappiaqqatigut aningaasat 1 milliardit karsimit anisillugit aningaasat sanaartornermut iluarsartuussinermullu aningaasaateqarfimmut nutaamut inissinnerannit, 2022-mi amigartoornerujussuaq pivoq.

Taama iliorneq isumatusaarnerusoq, Aalborg Universitetimi aningaasanik aqutsinermut professori, Per Nikolaj Bukh, isumaqarpoq:

- Suu iluamik aamma pitsaanngitsumik ingerlanerannik takutitsineq taanna pitsaasuuvoq. Eqqunngitsuliornerusimasut maanna ataatsikkoortillugit aningaasartuutigineqarput, Per Nikolaj Bukh oqarpoq, nangillunilu:

- Akiliisinnaassuseqarnermut tunngatillugu aaqqiissummik nassaartoqarpoq, taamaalillunilu aningaasat kontomut taakku inissikkallarneqarput. Suliarlu taamaalilluni 'nipiliorunnaarpoq', ajornartorsiutitoqqanullu aningaasanik nutaanik taama nassaartuartoqartussaanngilaq.

Aningaasaateqarfimmi 1,1 milliardit

Sanaartornermut iluarsartuussinermullu aningaasaateqarfik ''missingersuutinut kontotut'' nassuiarneqarsinnaasoq, Per Nikolaj Bukh oqarpoq, iluarsartuussinermut sanaartornermullu aningaasanut immikkoortitsiviusoq:

- Isumatusaarluni aaqqiineruvoq. Nalinginnaasumik nammineq aningaasaqarnermik pitsaasumik nalinginnaasumik takutitsisuusoq oqartoqarsinnaavoq, Per Nikolaj Bukh oqarpoq.

2022-p naanerani aningaasaateqarfimmi 1.098,6 mio. kr.-nik aningaasaateqartoqartoq, ingerlatsivik politikerinut allappoq, taakku 2022-mut sanaartornermut aningaasaliissutaallutik, taavalu aningaasartuutit katillugit 182,8 mio. kr.-it ilanngaatigineqarput.

Aningaasaateqarfimmi aningaasat atorneqarsinnaasut, tamangajammiusut – 1.030 mio. kr.-niupput – Nuuk City Developmentimit pisinissamut immikkoortinneqartut.

Kattunneq naammassillugu akuerineqartoq

NCD-mi pigisat nalillit:

• Illoqarfiup qeqqani atuarfik nutaaq (ingerlasoq)
• Illoqarfiup qeqqani ulluunerani paaqqinnittarfik (ingerlasoq)
• Qapiarfiusaami ulluunerani paaqqinnittarfik (atulereersoq)
• Ulluunerani paaqqinnittarfik Inussivik (atulereersoq)
• Ulluunerani paaqqinnittarfik Maligiaq (atulereersoq)
• Qatserisartoqarfik (atulereersoq)
• Saviminermik attartorneq (pisiarineqartoq)

Kommunip siorna inissiaatileqatigiiffimmut kattussinikkut NCD-mik atorunnaarsitsinissamik pilersaarutini saqqummiuppaa. Iserit-ip NCD-p illuutai pisiarai, illuanik NCD-p sanaartornermut suliniutai kommunip tigugai. Sermersooq 1,25 milliardit koruuninik taarsigassarsinissamut decembarimi Naalakkersuisunit akuerineqarpoq, kommunip taamaalilluni pigisat nalillit tigusinnaassammagit.

Aningaasaqarnermut ataatsimiititaliap 31. januar ataatsimiinnermini kattunneqarnerat naammassillugu akueraa, kiisalu Nykreditimi taarsigassarsisoqassasoq. Taarsigassat angerlaanneqareerpata, aningaasallu karsimiilerpata, kattunneq naammassineqarsinnaassaaq.

Siumup kattunneq imaluunniit taarsigassarsiniarneq aningaasaqarnermut ataatsimiititaliami akuerinngilaat, NCD pillugu annertusisamik kukkunersiuilluni attuumassuteqanngitsumik misissuisoqarnissaanik piumasaqarmat, partiillu tamatuma inernera takoqqaarniaramiuk.