NCD-mi tukattumik ingerlatsisoqareersoq: Sermersooq 1,25 milliarder koruuninik taarsigassarsiniartoq
Aningaasat ilaatigut Nuummi atuarfissap, sanaartorlugu aallartinneqareersup akilerneqarnissaanut atorneqassapput.
Kommuneqarfik Sermersuumi kommunalbestyrelsip ullumi immikkut ataatsimiinnermini aalajangiissuteqassaaq.
Nuup illoqarfiata qeqqani angisuumik atuarfiliortoqaleruttorpoq, kommunilli atuarfiup qanoq akilerneqarnissaa suli inississimanngilaa. Atuarfiliorneq kommunip illoqarfimmik ineriartortitseqatigiiffiata Siorarsiorfik Nuuk City Development A/S-ip (NCD) sanaartortitaraa, atuarfissalli 695 millioner koruuninik aningaasaliiffigineqarnissaa suli inissinneqarsimanngilaq.
Kommunimi ingerlatsivimmit kommunalbestyrelsimut qinnutigineqarpoq NCD matuneqassasoq, kommuni NCD-p atuarfiliortitsineranik arlalinnillu paaqqinnittarfiliortitsineranik tigusisussanngorlugu.
Siunertamut tassunga kommuni aningaasarpassuarnik pisariaqartitsivoq, kommunimilu ingerlatsiviup Nykreditsimut 1,25 milliarder koruuninik taarsigassarsiniarnissaq qinnutigisimallugu.
Kommunalbestyrelsi pilersaarummut akuersaassappat, kommunip aningaasarpassuarnik taarsigassarsiniarnera Naalakkersuisunit aamma akuersissutigineqartussaavoq.
Ingerlatsivimmit inassuteqaat naapertorlugu, taarsigassarsiat ukiumut 75 millioner koruninik akilersorneqartarnissaat naatsorsuutigineqarpoq. Aningaasat taakku kommunip missingersuutaani 2024-imiit immikkoortinneqartassapput.Aningaasat pineqartu NCD-mut atuarfimmik paaqqinnittarfinnillu piginnittuusussaagaluartumut attartornermi akiliutigineqartussaagaluarput.
NCD akiliisinnaajunnaalersoq
Maanna pilersaarutaavoq NCD atorunnaarsinneqassasoq, kommunilu atuarfiliornermik tigusissasoq. Tassunga atatillugu kommunip ingerlatsivianit erseqqissaassutigineqarpoq, NCD aqqutigalugu aningaasalersuinermut sanilliullugu kommuni akikinnerusumik taarsigassarsisinnaasoq.
Ingerlatsivilli aamma allappoq, NCD aqqutigalugu aningaasalersuinissamut Namminersorlutik Oqartussanit akuersissummik pissarsiniartoqarsimanngitsoq aamma periuserineqartumut aatillugu inatsisitigut aporfissaqartoqartoq Namminersorlutik Oqartussanit takuneqarsinnaasimasoq.
Naalakkersuisut pilersaarummut akuerseqqaartussaasut aamma sanasumit Ístakimit NCD-p atuarfiliortitsineranik kommunip tigusinissaa akuerineqaqqaartussaavoq.
Ingerlatsiviup inassuteqaataa naapertorlugu iliuuseqartoqartariaqarnera qularutissaanngilaq, NCD "2022-p naanerani akiliisinnaassutsimigut annertuumik ajornartorsiuteqalertussaammat".
Allatut oqaatigalugu kommunimi politikkerit ingerlatsiviup annaassiniarnissamut pilersaarutaa akuerinngippassuk NCD akiliisinnaajunnaartussaavoq.
Siumut akerliusoq
Suliaq kommunip aningaasaqarnermut ataatsimiititaanit sapaatip-akunnerani kingullermi suliarineqarmat, pilersaarut Inuit Ataqatigiit, Naleqqap Demokraatillu ilaasortaatitaannit akuersissutigineqarpoq.
Partiit taakku pingasuullutik kommunalbestyrelsimi amerlanerussuteqartut pilersaarummik akuersissuteqarsimapput.
Siumup pilersaarut ataatsimiititami suliarineqarmat akuersissutigerusussimanngilaa. Partiip ataatsimiititami ilaasortaatitaa ataaseq Inga Dor G. Markussen isumaqarami, suliaq erseqqissummik nassuiarneqarsimanngitsoq. Taassuma borgmesterimut kaammattuutigisimavaa, pineqrtoq tamanut saqqummiutissagaa, tamannalu maanna pivoq.
Inga Dora G. Markussen tamatuma saniatigut isumaqarpoq, NCD-mi inissisimanermut atatillugu aquysisut siulersuisullu naammaginartumik nassuiaassuteqarsimanngitsut.
Ajornartorsiutaasut ingerlatsisimanermik kukkunersiuinermi saqqummiunneqartut
Nuummi atuarfissap aningaasalersorniarneqarnerani ajornatorsiutaasut, kommunip inissaqartitsiniarnermik ingerlatsisimanerani kukkunersiuisimanerup saqqummiunneqarneranut atatillugu saqqummiunneqarput.
Kukkunersiuisup assut isornartoqartissimavaa, atuarfiliorneq ingerlallualereersoq atuarfissap aningaasalersorneqarnissaanut kommunip pilersaaruteqarsimannginnera. Pilersaarutaasut malillugit kommuni 200 aamma 250 millioner koruunit akornanni akiliuteqartussaasimavoq.
"Kommuni missingersuutitut kingusinnerusukkut saqqummiussaani atuarfiup naatsorsuutigisatut atuutilernerani aningaasat taamak amerlatigisut ingerlatseqatigiiffimmut akilersinnaanissaannut periarfissaqarnavianngilaq," kukkunersiuisoq nalunaarusiami allassimavoq.
NCD-mi ajornartorsiutigineqartut ullormu kommunalbestyrelsip ataatsimiinnissaanut saqqummiussissummi erseqqissaassutigineqarput. Tassani aamma NCD-p sanaartukkani allat aqussinnaanngikkai allassimavoq:
- Sanaartukkap atorneqalernissaanut attartornissamik suli isumaqatigiissuteqartoqarsimanngilaq, taamaammat kommuni attartornissamut suli akiliuteqarsimanngilaq. Sanaartukkat aamma atorneqalereersut 30 pct.-imik akiliuteqarfigineqarnissaat suli naatsorsorneqarsimanngillat. Kommuni atuarfissamik nutaamik pituttuisumik suli isumaqatigiissuteqarsimanngimmat, atuarfiup aningaasalersorneqarnissaanut NCD A/S isumaqatigiissusiorsinnaasimanngilaq, Kommuneqarfik Sermersuumi ingerlatsivik allappoq.