Navianartumik qilalugarniartarneq iliuuseqarfiginiarneqartoq

Avannaani sumiiffiit ilaanni qilalugarniartarneq ima ulorinartigilersimavoq, aqerlumit tammiffigitinnissaq aallartoorfigitinnissarluunniit inuunermik allaat naleqarsinnaalluni. Tamannalu pinaveersaartinniarlugu KNAPK Avannaatalu Kommuniani politikerit iliuuseqarnialerput.

Avannaani qilalugarniarnermi piniariaaseq navianarsinnaasoq atuuttoq, aalisartut piniartullu peqatigiiffiisa arlallit oqaatigaat.

Qilalukkat qernertat qaqortallu mattaat neqaallu piumaneqartorujussuupput, piniartunullu aningaasatigut isertitsissutaalluartarlutik, ilaatigut mattak kilomut 275 kronilerlugu akilersinneqartarluni.

Aviisi Sermitsiaq taama allappoq.

Taamaattumik qilalugarniarnermi pisaqaqataanissaq qulakkeerniarlugu, sapinngisamik seqqorsimanissaq pingaartinneqartorujussuusarpoq. Seqqorsimanngikkaannimi kapisisimanngikkaanniluunniit piniaqataasuniit ilaatigut uippallersimasutut pissuseqalersimasuniit peersinneqarnissaq qularutissaaneq ajorpoq.

Taamatulli piniariaaseqarner­mi imassat aqerlui umiatsiat inuillu akornisigut, allaat inuunermik naleqarsinnaasumik, tammisinneqartarput, umiatsialluunniit imminnut aporsinnaasarlutik.

Tamannali inuunermik akeqannginnerani unitsinniarlugu aaqqiissutissamik ujartuisoqarnissaa sulissutiginiarneqalerpoq.

KNAPK-ip ajornartorsiut ilimavaa

Piniariaaserlu taanna ukiuni arlalinni su­­miiffiit ilaanni atugaasoq, allaallu inuunermik navianartorsiortitsinermik kinguneqaratarsinnaasoq, Kalaallit Nunaanni Aalisartut Piniartullu Kattuffiannit, KNAPK-mit ilimaarigitsik, siulittaasuugallartoq Karl Tobiassenip, oqarpoq. Tamannali internetsikkut inuit attaveqatigiittarfiisigut maannakkumut annerusumik taamaallaat kis­sassimaarfiusumik oqallissutaasartoq, taanna oqarpoq.

– Pissutsit tamakku immikkoortortaqarfitsinniit KNAPK-mut anngunneqartarnissaat kaammattuutigisarnikuugaluarparput kinguneqartanngitsumilli, tamannalu uggornarpoq, Karl Tobiassen oqarpoq.

Aviisimi Sermitsiami atuarnerusinnaavutit, ajornartorsiut pillugu Avannaata Kommuniani aalisarnermut piniarnermullu ataatsimiititaliap oqaaseqartinneqarnera aamma atuarsinnaavat. Aviisi uani pissarsiarisinnaavat:

Powered by Labrador CMS