Navianartorsiortoq: Nanumik saassutsitoq

Nannup Jan Lorentzen Ittoqqortoormiininngaanneersoq arlaleriarlugu keeriaraluarpaa

Jan Lorentzenip Ittoqqortoormiininngaanneersup ippassaq Uunartumiitilluni nanumik naapitaqarnera amiilaarnartumik kinguneqangajappoq.

- Qamuteralakka aallartissimanngitsuuppata ullumikkut oqaloqatigissanngikkaluarpakkit, taanna Sermisitsiaq.AG-mut oqarpoq

Nanoq tillukkaa

Jan Lorentzenip ippassaq 15:30 missaani Uunartumut illuaraatiminik alakkaatillugu pisoq aallartippoq. Silaginnerpaanngimmat ingerlaannaq utissalluni aalajangersimangaluarpoq. Kisianni sarfaliuutini illuaqqamiittoq orseqqaassallugu aalajangiussimavaa.

Minutsit qulit iluanni piareersimavoq, sarfaliuutinilu nassarlugu illuaqqamiit anilluni.

- Anillakkama nannup tumai nutaat saanniittut takuakka, taanna oqaluttuarpoq.

- Illuanut saappunga, nanorlu 10 meterit missaanni ungasitsigisoq takullugu. Sivikitsumik toqqarluta isigaagut, nanorlu pissippoq.

- Tunginnut arpariarluni keeriarpaanga, sapinngisarali tamaat niaquatigut tillukkakku qujanaqisumik kiinngilaanga.

Qamuteralaat tungaannut arpattoq

Jan qamuteralaat 10 meterimik ungasitsigisut tungaannut arpalerpoq.

- Qamuteralaalli suli angunngikkikka nanoq saannut pivoq. Qamuteralaallu suli tikinnagit nanoq pingasoriarlugu tilluppara.

Jan siullermik misiiliinermini qamuteralaat aallartissimanngilai, aallartissimappulli.

- Aallartiikkakkit qimaariarluni pissippoq. Ingerlalersungali tunginnut pisseqqilluni. Qujanartumillu qimappara.

Jan isumannaatsumut pingami najukkami piniartunut kalerriivoq, taakkuli nanoq pisaraat.

Assaa kisimi pullattoq

Jan Lorentzen Ittoqqortoormiit inunngorfigaa peroriartorfigillugulu, taamaammaat aatsaat nanumik takunngilaq. Tassungali eqqaanarsinnaasumik misigisaqarnikuunngisaannarsimavoq.

- Arlaleriarluni keeriartaraluarpaanga, pisariniarsimassangaangali qularinngilara.

Nanup Jaani kiisimanngilaa, taamaammat taassuma nanup niaquatigut sakkortuumik tilluisimaneranik assaa kisimik pullappoq.

Nanup pisarineqarnerata kingorna Jaani angerlamut ingerlaqqippoq.

- Angerlarsimaffinniilerlunga timera tamarmi sajuttoq malugivara. Arlalitsigut ernutakka illuaqqamut ilagisarpakka, ilangisimangaluarukkillu qanoq pisimasoqarsinnaanera takorloorsinnaanngilara.

Nanumik allamik toraarsisut

Ullumikkut ajunnginnerulersimaqaaq, illuaqqanilu alakkarsinnaallugu. Taannalu, piniartup ullumi nannussimalluni pilaleruttornerata nalaani sanianiittoq, oqaloqatigaarput.

- Nanoq piaqqani ilagalugit sikukkut ingerlaartut takusinnaavagut. Ukiormannali ukiuunerani nannut assut amerlapput.

Tallimanngormat Sermitsiap oqaluttuaraa, ukioq manna Ittoqqortoormiit eqqaani nannut katillugit 17-it pisarineqarsimasut. Pisassiissutit 35-iupput maannalu ikinnerpaamik marluk pisarineqareersimallutik.

- Annertunerusumik pisoqarsimannginnera qujamasuutigaarput, Jan Lorentzen oqarpoq, nassuerutigaali aallaaseqarani illuaqqamukarsimanini sianiilliornerusoq.

- Uumasoq kusanartuuvoq, uumasorli aamma uloriarnartuuvoq.

Powered by Labrador CMS