Eqqartuussineq

Nauja Lynge: - Sakkortoqaaq

Nauja Lynge aamma Ulrik Merrild inuussutissarsiornermut tapiissutinik 2,5 million koruuningajannik Namminersorlutik Oqartussanit atornerluisimasutut eqqartuussivilersuunneqarput. Maanna Nunatta Eqqartuussiviata ukiuni arlalinni ilungersoreerluni suliaq naggaserpaa niuernermillu ingerlatsisut marluk pinngitsuutillugit

- Tassanngaannaq pinerluttutut pasillerneqarneq uannut ilaquttannullu sakkortoqaaq. Taama oqarpoq aallarnisaasoq Nauja Lynge.

Taamanikkut suleqatigisani Ulrik Merrild peqatigalugu 2,5 million koruuningajaat pillugit Namminersorlutik Oqartussanit eqqartuussivilersuunneqarpoq.

Ukiut arfineq marluk saqitsaatereernikkut Nunatta Eqqartuussiviata niuernermik ingerlatsisut marluk pinngitsuutippai. Taamaalilluni Aarhus Byretip aalajangiigaa naqissuserneqarpoq, Namminersorlutillu Oqartussat 2,5 million koruuningajaat eqqartuussivilersuussatik pissarsiarinavianngilaat, aammalu suliami aningaasartuutit 127.000 koruunit Ulrik Merrildimullu 135.000 koruunit akilertussanngorlugit.

Nauja Lynge Nunatta Eqqartuussiviani akiliisussaanani eqqartuussisutigoortinneqarpoq, tamannalu illoqarfiup eqqartuussiviani aamma qinnutigaa itigartinneqarlunili.

- Taamaalilluni peqquserluttoqarsimanngilaq. Nunatta karsia imaarniarsimanngilarput inuulluataapilunniarlutaluunniit. Namminersorlutik Oqartussat unnerluussinerminni ilalerneqanngillat, Nauja Lynge oqarpoq.

2009-mi niuernermik ingerlataqartut marluk The Greenland Company aallartippaat, Kalaallit Nunaata eqalussuaanit atorfissaqanngitsutut isigisamit tunisassiortussaallutik, Asiamut eqalussuup sulussugutaanik suppaliortussaallutik atisaliortartunullu eqalussuup amianik. Aallarnisaasut siunertamut taamaattumut taamanikkut aalisarnikkut nutaaliornermut Namminersorlutik Oqartussanit aningaasaliissutinik qinnuteqarput, marloriarlutik akilerneqarlutik. Ukiorli ataaseq qaangiutiinnartoq suliffeqarfik akiliisinnaajunnaarpoq, aallarnisaasullu marluk Namminersorlutik Oqartussanit inuussutissarsiornermut tapiissutinik atornerluisimasutut eqqartuussivilersuunneqarlutik.

Suliaq pillugu AG-mi paasisaqarnerugit:

Powered by Labrador CMS