Skip to main content

Nauja Lynge busserlutik takuniaasunut oqaluttuussinermik misileeqqaartoq

Kalaallit danskillu ataatsimut oqaluttuassartaat Aarhusimi malunniulluarsimavoq. Tamanna tunngaviuvoq atuakkiortup oqalugiartartullu Nauja Lyngep busserlutik takuniaasunut qanittumi oqaluttuusseqqaarneranut.

Bussinut ilaapput Odderimi Rude Strand Seniorhøjskolemi atuartut Kalaallit Nunaat pillugu atuarfimmi pikkorissarsimasut. Ingerlaarneq aallartinneqarpoq Aarhusimi Kalaallit Illuanniit, tassani utoqqasaat illumi suliaqartarneq, illulu allilerlugu sanaartorneq upernaaru naammassineqarpat, siunissamut pilersaarutit pillugit oqaluttuunneqarput.

Tamanna pereermat Aarhusimi rådhusiliarput, kalaallit eqqumiitsuliarpassuannik katersaatilimmut. Rådhusimi kommunip Kommune Kujallermik ikinngutigiittut suleqateqarnera oqaluttuarineqarpoq, Inuit Feetimilu erinarsortartoq Kristian Mikkelsen kalaallit erinarsuusiaannik tusarnaartitsilluni. Ingerlaarneq Aarhus Havnimi naggaserneqarpoq, tassani RAL-ip Kalaallit Nunaannut assartuisarfik Aarhusimut nuunniarlugu pilersaarutaa tusarliunneqarput.

Angalasaqattaarnissamik pilersaaruteqarneq

- Isumassarsiaq qangali eqqarsaatigisarsimavara, taamaammat højskolertut angalaartinneqarnerat aallarniutitut suliniutaavoq. Ajunngilluinnartumik ingerlavoq, taamaammat Københavnimi kalaallit sunniuteqarfigilluartarsimasaanni taamatut suliaqarniarlugna piareersaavunga. Folketingimi ilaasortaq, SF-imi Kalaallit Nunaannut tunngatillugu oqaaseqartartoq Kalaallillu Nunaata oqaluttuassartaanik soqutiginnittupilussuaq suleqatigalugu tamanna pissaq, Nauja Lynge oqarpoq

- Bussinik angalaartitsineq taaguuserparput ”I fodsporet på de grønlandske ressourcer” (kalaallit nukii tumisiorlugit), isumaqaratta Kalaallit Nunaata Danmarkillu ataatsimut oqaluttuassartaat Danmarkimi erseqqissumik takuneqarsinnaasut. 

Privatfoto

- Aamma takorluugaraara, Jyllandip avannaani, Hans Egedelli nalaani Kalaallit Nunaannut atassuteqarluarsimasumi bussinik ingerlaartitsisarnissaq.

Ataatsimut oqaluttuassartavut Kalaallit Nunaannut Danmarkimullu sunniuteqarsimapput. Danmarkimi kalaallit sunniuteqarfigisimasaannik misissuinermi kalaallimik siuttoqarnissaa pingaaruteqarpoq, Nauja Lynge oqarpoq.

Arhusimi bussinik ingerlaarneq nalunaaquttap akunnerinik pingasunik sivisussuseqarpoq, Rude Strand Seniorhøjskolelu, Kalaallit Nunaat pillugu sapaatip akunnerini arlalinni ilinniartitsisarsimasoq suleqatigalugu aaqqissuussaq ingerlanneqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER