Nationalbanki: Suliffeqarfiit suli annertuumik tatineqaqqapput

Nunami ukiuni amerlasuuni aningaasarsiornikkut qajannaatsumik siuariartorneq nunarsuaq
tamakkerlugu coronamik tunillaassuunnermik kipitinneqarsimavoq. Danmarks Nationalbanki Kalaallit Nunaata aningaasaqarneranik ukiumoortumik naliliinermini taamatut allappoq.

Nationalbankimit aamma inerniliunneqarpoq, pisortat akiitsui amerliartussasut, akiitsulli amerliartornerat appasissumiit aallartiffeqassasoq. Inerniliunneqartoq alla tassaavoq, siunissami isertitat aningaasartuutillu oqimaaqatigiissinneqarnissaat qulakkeerniarlugu pisortat ingerlataqarfiisa pisariillisaaffigineqarnissaat pisariaqartinneqartoq.

Aningaaserivimmilli aamma erseqqissaassutigineqarpoq, Kalaallit Nunaanni pissutsit immikkuullarissuuneri pissutigalugit, nuna nunarpassuarnut allanut sanilliulluni tuniluunnermit annikinnerusumik sunnerneqarsimasoq.

Suliffissaaleqineq suli annikitsoq

Kalaallit Nunaanni suliffissaaleqisut suli ikittuunnguupput:

- Suliffeqartut ukiut tulleriit ingerlanerini amerliartorsimapput, suliffeqarfeqarfillu ilungersunartumi inissisimavoq.

- Naak suliffissaaleqineq upernariartornerani annertusiartorsimagaluartoq suli appasissumiippoq, maannalu sulisinnaasut 5 procentiisa missaanniilluni, kommunini suliffissarsiortut amerlassusaat najoqqutaralugu nalileraanni. 2014-imiit
affaannanngorsimapput, Nationalbanki naliliinermini allappoq.

Suliffissarsiortut katillutik 1.615-it septembarip qaammataani kommuninut saaffiginnissimapput:

Ilinniartitaaneq qitiutinneqartariaqartoq

- Kisitsisip taassumap hotelini, neriniartarfinni, takornariaqarnermi assartuinermilu kaaviiaartitsinerup kinguariarnera suli annikikannersuinnarmik suliffissaaleqinermik
kinguneqarsimannguatsiartoq takutippaa. Inuussutissarsiornermut akissarsialinnullu tapiissutit qularnanngitsumik suliffeqarfeqarfimmi sunniutit minnerulersinnissaannut tapersiisimapput, Nationalbanki allappoq.

Aningaaserivik naapertorlugu, inuusuttut amerlanerit ilinniagaqarnissaat ukkatarineqartariaqarpoq, ataasiakkaat suliffeqalernissaannut tamanna pingaaruteqarluinnarmat. Inuit meeqqat atuarfiata kingorna ilinniagaqarsimanatik
suliffissaaleqisut 2018-imi 9,3 procentimik amerlassuseqarsimapput, illuatungaani inuussutissarsiornermik ilinniagallit 2,8 procentimiillutik inuillu qaffasinnerusumik ilinniagalllit akornanni 0,5 procentimiilluni.

- Suliffeqarfeqarfimmi piukkunnassutsit piginnaasallu annertuumik pisariaqartinneqarput,
pisariaqartitsinerlu taanna qularnanngitsumik siunissami alliartuinnassaaq, Nationalbanki allappoq.

Kalaallit Nunaat taamaammat sakkukinnerusumik eqqugaasimavoq

Suliffeqarfeqarfimmi kinguariarneq nunanit allaninngarnit minneroqaaq, aningaaserivik inerniliivoq.

Kalaallit Nunaata aningaasaqarnerata coronap tuniluunneranit sakkukinnerusumik eqqugaasimaneranut Nationalbankip pissutsit pingasut pissutaanerarpai:

Siullertut tuniluunneq pilertortumik nunamut siaruatsaalineqarsimavoq, taamaattumillu
nunami namminermi mattussinerit killilersuinerillu pilertortumik naammassineqarsinnaasimallutik.

Aappaattut inuussutissarsiornerup aaqqissugaanerata immini nunarsuarmi tamarmi nioqqutissat akiisa allanngorarnerinut tunaartaqarnermut minnerulersitseqataavoq. Aalisarneq inuussutissarsiutaavoq sutigut tamatigut nuimanersaasoq, pisallu nunarsuarmi tamarmi tunisaqarnikkut pissutsit allanngorsimanerannik sunnerneqarsimanngillat. Aalisarnermi aarleqqutissaq ingammik aalisakkat qaleruallillu akikinnerulersinnaanerannut tunngatinneqarpoq.

Pingajuattut Kalaallit Nunaanni pisortat ingerlataqarfiat annertuvoq, ilaatigut qallunaat naalagaaffiata Kalaallit Nunaannut tapiissuteqarneragut taama pisoqarsinnaalersimalluni. Kiisalu aamma atuinermut aningaasaliinernullu eqqussorneqartut annertupput, taamaammallu inuussutissarsiutinut allanut takornariaqarnermi silaannakkullu angallannermi kinguariartorfiusunut malitsigisaanik sunniutai nunanit allanit
sakkukinnerullutik, taakkunanimi nunami namminermi pilersuineq pingaarnerusumik inissisimasarami.