Nationalbanki: Namminiilivinneq aamma inuuniarnikkut pitsaasumi atugaqarneq ataatsimoortikkuminaapput
Inuuniarnikkut atukkat allanngortinnagit namminiilivinneq piviusunngortinneqassappat, inuussutissarsiutit aaqqissugaanerata siammasinnerunissaanik tamanna pisariaqartitsivoq, Nationalbanki nalunaarusiami taama allappoq.
Namminiilivinnissaq nunap aningaasaqarnera aalisarnermik kisimi isumalluuteqannginneranik pisariaqartitsivoq, Nationalbanki nalunaarusiami taama allappoq.
- Namminiilivinnissamik inuuniarnikkullu atukkanik pitsaasunik kissaatit piviusunngortikkuminaapput. Taakku angussagaanni inuussutissarsiutit aaqqissugaanerata siammasissuunissaa ilaatigut pisariaqarpoq suliffeqarfinnilu pisortat pigisaanni aamma namminersortuni, ingammik aalisarnerup iluani, nalunaarusiami inerniliussat qitiusut ilaat taama oqaatigineqarpoq.
Pisortat suliffeqarfii aamma suliffeqarfinnut namminersortunut assersuunneqarpallaartut, nalunaarusiami oqaatigineqarpoq.
- Oqartussat aningaasartuutaat 2016-imi BNP-p 43 procenterivaa, Danmarkimi 25 procent-iulluni. Appartariaqarpoq. Namminersortuni amerlaqataanik suliffissanik pilersitsiniaraanni Kalaallit Nunaanni akissarsiat nunat allat eqqarsaatigalugit akissarsiat qaffasissut atorlugit pilersinneqassappata sulisinnaasut siunissami pisinnaasaannik annertuumik piumasaqaatitaqarpoq. Inuussutissarsiutilli aaqqissugaanerat siammarniarlugu siuariartoqarsimavoq.
Inuussutissarsiutit aaqqissugaanerat siammasinneruleriartortillugu alloriartoqartoq, nalunaarusiami oqaatigineqarpoq. Takornariaqarnikkut siuariartoqarpoq. Aatsitassarsiorneq aallartikkiartulerpoq. Aappaluttup eqqaani rubinisiorfik tunisassiorpoq. Kangerlussuup eqqaani anorthositinik piiaaffik tunisassiorluni aallartingajalerpoq.
- Aatsitassarsiornermi piiaasinnaanngulersut arlaqarput. Inuussutissarsiornermi suliffissanik assigiinngissitaarnerusunut tapertaalluarput, naalagaaffimmilli tapiissutit taarsernissaannut aningaasatigut tunngavissatut amigarlutik.