mianersoqqussut
Nationalbanki: Mittarfiit akisunaarneqarsinnaapput
Qaqortumi, Nuummi aamma Ilulissani mittarfiit sananeqarpata nunatta karsianut malunnaatilimmik akisunaassavaa.
Nuummi Ilulissani aamma Qaqortumi mittarfiliornissamut pilersaarutit amingartoorutaasinnaapput.
Danmarkimi Nationalbankip Kalaallit Nunaata Aningaasaqarneranut misissueqqissaarnermini nalilerpaa.
- Suliniutigineqartut pingasut ilimagisamiit akisunerujussuusinnaasut, nalunngilarput, misissueqqissaarnermi allattoq, siunnersorti Anders Møller Christensen Sermitsiaq.AG-mut oqarpoq.
Aalajangiinermi tunngavilunneq
Mittarfinnuinnaq aningaasaat 2,5 milliardi koruunit atorneqartussatut naatsorsorneqarsimangaluarput. Taamalu naliliineq annikippallaarpoq. Aningaasat taakkua saniatigut mittarfimmi sanaartugassat akilerneqartussaapput. Qanorpiarlu akeqassanersoq Kalaallit Airportsip naatsorsuleruttorpaa.
- Tupigusuutigaara mittarfinnik pingasunik tunngavissaqarluarani sanaartortitsiniarluni politikkikkut aalajangiisimaneq, Anders Møller Christensen oqarpoq.
- Suliniutigineqartut pingasut kingunissaat ilisimaneqanngilaq, imminulli akilersinnaanersut aamma ilisimaneqaratik.
Nunatta karsiarnut akisunaarneqarsinnaavoq
Marlunnik mittarfissualiortoqarpat saniatigulli Qaqortumi mittarfiliortoqarluni tamanna Kalaallit Nunaanut angalasartunut akiligassaq annertoorujussuusinnaavoq. Ima annertutigisinnaavoq allaat imminut akilersinnaanani.
Naggataanilu suliniutigisani aningaasaqarneq ingerlanerluppat nunap karsianit aammalu akileraartartunit akilerneqartussanngortussaalluni.
- Assartuussineq pillugu isumalioqatigiissitap 2011-mi siunnersuutaani mittarfissuaq Nuummut nuunneqarnissaanut aningaasaqarnikkut akilersinnaasoq ilisimavarput.
- Pingasunillu mittarfiliortoqassappat aningaasaqarnikku qanoq ikkumaarnera ilisimanatigu, Anders Møller Christensen oqarpoq.
Taanna isumaqarpoq politikkerit mittarfiliornissamut suliniutinut aningaasartuutissat utaqqeeqqaartariaqarsimangaluaraat. Ingammik Nuup illoqarfittut ilassaa – Siorarsiorfik – ilanngullugu sanaartorneqarnerani aningaasaqarniarnikkut artukkeerujussuarnermik kinguneqarsinnaatillugu.
AAMMA ATUARUK: Nationalbanki: Aningaasaqarnikkut politikki suli qajannaatsuunngilaq